ਨਵੀਂ ਦਿੱਲੀ, 16 ਮਾਰਚ – ਇਨਫੋਰਸਮੈਂਟ ਡਾਇਰੈਕਟੋਰੇਟ ਨੇ ਏਡੀਏਜੀ ਗਰੁੱਪ ਦੇ ਚੇਅਰਮੈਨ ਅਨਿਲ ਅੰਬਾਨੀ ਨੂੰ ਯੇਸ ਬੈਂਕ ਮਾਮਲੇ ‘ਚ ਸੰਮਨ ਜਾਰੀ ਕੀਤੇ ਹਨ ।ਨਿਊਜ਼ ਏਜੰਸੀ ਪੀਟੀਆਈ ਦੇ ਅਨੁਸਾਰ ਇਨਫੋਰਸਮੈਂਟ ਡਾਇਰੈਕਟੋਰੇਟ ਨੇ ਅਨਿਲ ਅੰਬਾਨੀ ਨੂੰ ਯੇਸ ਬੈਂਕ ਸੰਕਟ ਮਾਮਲੇ ਵਿੱਚ ਤਲਬ ਕੀਤਾ ਹੈ।
ਇਨਫੋਰਸਮੈਂਟ ਡਾਇਰੈਕਟੋਰੇਟ ਬੈਂਕ ਪ੍ਰਮੋਟਰ ਰਾਣਾ ਕਪੂਰ ਦੇ ਹਵਾਲਾ ਮਾਮਲਿਆਂ ਦੀ ਜਾਂਚ ਕਰ ਰਿਹਾ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਅਨਿਲ ਅੰਬਾਨੀ ਸਮੇਤ ਕਈ ਹੋਰ ਸਨਅਤਕਾਰਾਂ ਤੋਂ ਇਸ ਮਾਮਲੇ ਵਿੱਚ ਪੁੱਛਗਿੱਛ ਕੀਤੀ ਜਾ ਸਕਦੀ ਹੈ।
ਹਾਲ ਹੀ ਵਿਚ ਮੀਡੀਆ ਵਿਚ ਖ਼ਬਰਾਂ ਆਈਆਂ ਸਨ ਕਿ ਅਨਿਲ ਅੰਬਾਨੀ ਯੇਸ ਬੈਂਕ ਦੇ ਸਭ ਤੋਂ ਵੱਡੇ ਡਿਫਾਲਟਰਾਂ ਚੋਂ ਇੱਕ ਹਨ । ਭਾਜਪਾ ਨੇਤਾ ਕਿਰੀਟ ਸੋਮਈਆ ਨੇ ਵੀ ਟਵੀਟ ਕੀਤਾ ਸੀ ਕਿ ਅਨਿਲ ਅੰਬਾਨੀ ਸਮੂਹ ਨੇ ਯੈਸ ਬੈਂਕ ਤੋਂ ਲਏ ਗਏ ਕਰਜ਼ੇ ਵਿਚੋਂ 12800 ਕਰੋੜ ਰੁਪਏ ਦਾ ਭੁਗਤਾਨ ਨਹੀਂ ਕੀਤਾ। ਇਸ ਤੋਂ ਇਲਾਵਾ ਉਨ੍ਹਾਂ ਨੇ ਰਾਜ ਸਭਾ ਮੈਂਬਰ ਸੁਭਾਸ਼ ਚੰਦਰ ਦੀ ਮਲਕੀਅਤ ਵਾਲੇ ਐਸਲ ਗਰੁੱਪ ਨੂੰ 8400 ਕਰੋੜ ਰੁਪਏ ਦਾ ਡਿਫਾਲਟਰ ਦੱਸਿਆ।
ਦੂਜੇ ਡਿਫਾਲਟਰਾਂ ਵਿੱਚ ਦੀਵਾਨ ਹਾਊਸਿੰਗ ਨੇ 4,735 ਕਰੋੜ ਰੁਪਏ, ਆਈਐਲ ਐਂਡ ਐਫਐਸ ਨੂੰ 2500 ਕਰੋੜ ਰੁਪਏ ਅਤੇ ਜੈੱਟ ਏਅਰਵੇਜ਼ ਨੂੰ 1100 ਕਰੋੜ ਰੁਪਏ ਸ਼ਾਮਲ ਹਨ।