ਲੁਧਿਆਣਾ, 9 ਮਾਰਚ – ਚੰਡੀਗੜ੍ਹ ਰੋਡ ਸਥਿਤ ਸਟੇਟ ਬੈਂਕ ਨਗਰ ਦੀ ਗਲੀ ਨੰਬਰ 3 ‘ਚ ਕੱਪੜਿਆਂ ਦੀ ਦੋ ਮੰਜ਼ਿਲਾ ਫੈਕਟਰੀ ‘ਚ ਅਚਾਨਕ ਅੱਗ ਲੱਗ ਗਈ। ਇਸ ਦੀ ਸੂਚਨਾ ਤੁਰੰਤ ਫਾਇਰ ਬ੍ਰਿਗੇਡ ਵਿਭਾਗ ਨੂੰ ਦਿੱਤੀ ਗਈ। ਫਾਇਰ ਬ੍ਰਿਗੇਡ ਦੀਆਂ ਪੰਜ ਗੱਡੀਆਂ ਮੌਕੇ ‘ਤੇ ਪਹੁੰਚ ਗਈਆਂ ਜਿਨ੍ਹਾਂ ਨੇ ਜਲਦੀ ਹੀ ਅੱਗ ‘ਤੇ ਕਾਬੂ ਪਾ ਲਿਆ। ਇਸ ਦੌਰਾਨ ਕਿਸੇ ਜਾਨੀ ਨੁਕਸਾਨ ਦੀ ਤਾਂ ਖ਼ਬਰ ਨਹੀਂ ਹੈ ਪਰ ਮਾਲੀ ਨੁਕਸਾਨ ਭਾਰੀ ਮਾਤਰਾ ‘ਚ ਹੋਇਆ ਹੈ।
ਜਾਣਕਾਰੀ ਮੁਤਾਬਿਕ ਅਜੈ ਟੈਕਸਟਾਈਲਸ ਦੇ ਨਾਂ ਤੋਂ ਇਹ ਫੈਕਟਰੀ 24 ਘੰਟੇ ਚੱਲਦੀ ਹੈ। ਸੋਮਵਾਰ ਸਵੇਰੇ ਜਿਵੇਂ ਹੀ ਦੂਜੀ ਸ਼ਿਫਟ ਦੇ ਮੁਲਾਜ਼ਮਾਂ ਨੇ ਗੁਦਾਮ ‘ਚੋਂ ਧੂੰਆ ਨਿਕਲਦਾ ਦੇਖਿਆ ਤਾਂ ਉਨ੍ਹਾਂ ਰੌਲਾ ਪਾ ਦਿੱਤਾ। ਸੂਚਨਾ ਮਿਲਣ ‘ਤੇ ਫੈਕਟਰੀ ਮਾਲਕ ਮੌਕੇ ‘ਤੇ ਪਹੁੰਚੇ।
ਫਿਲਹਾਲ ਅੱਗ ਲੱਗਣ ਦਾ ਕਾਰਨ ਸ਼ਾਰਟ ਸਰਕੱਟ ਦੱਸਿਆ ਜਾ ਰਿਹਾ ਹੈ। ਪੁਲਿਸ ਨੇ ਵੀ ਮੌਕੇ ‘ਤੇ ਪਹੁੰਚ ਤੇ ਜਾਂਚ ਪੜਤਾਲ ਸ਼ੁਰੂ ਕਰ ਦਿੱਤੀ ਹੈ।