ਬਠਿੰਡਾ , 29 ਫਰਵਰੀ – ਗੁਰਦੁਆਰਾ ਗੁਰੂ ਨਾਨਕ ਦਾਤਨ ਸਾਹਿਬ ਵਿਖੇ 22 ਫਰਵਰੀ ਨੂੰ ਇੱਕ ਮੰਦਭਾਗੀ ਘਟਨਾ ਵਾਪਰੀ, ਜਿਸ ਦੌਰਾਨ ਸਵੇਰ ਵੇਲੇ ਇੱਕ ਵਿਅਕਤੀ ਵੱਲੋਂ ਸ਼੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਬੇਅਦਬੀ ਕੀਤੀ ਗਈ, ਜਿਸਦੀ ਪਹਿਚਾਣ ਉਗ੍ਰਸੇਨ ਸੋਰੇਨ ਦੇ ਤੌਰ ’ਤੇ ਹੋਈ ਹੈ। ਉਕਤ ਵਿਅਕਤੀ ਨੂੰ ਉਸੇ ਵੇਲੇ ਰੰਗੇ ਹੱਥੀ ਫੜ੍ਹਿਆ ਗਿਆ ਅਤੇ ਪੁਲਿਸ ਦੇ ਸੁਪੁਰਦ ਕਰ ਦਿੱਤਾ ਗਿਆ। ਪੁਲਿਸ ਵੀ ਇਸ ਘਟਨਾ ਦੀ ਅਹਿਮੀਅਤ ਨੂੰ ਸਮਝਦਿਆਂ ਨਾਲ ਦੀ ਨਾਲ ਹਰਕਤ ਵਿੱਚ ਆਈ, ਜਿਸਦੇ ਚਲਦਿਆਂ ਕਮਿਸ਼ਨਰ, ਡੀ.ਸੀ.ਪੀ. ਅਤੇ ਹੋਰ ਵੱਡੇ ਪੁਲਿਸ ਅਫਸਰਾਂ ਨੇ ਡੀ.ਸੀ.ਪੀ. ਦੇ ਦਫਤਰ ’ਚ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਅਤੇ ਉੜੀਸਾ ਸਿੱਖ ਪ੍ਰਤਿਨੀਧੀ ਬੋਰਡ ਦੇ ਮੈਂਬਰਾਂ ਨਾਲ ਇੱਕ ਐਮਰਜੈਂਸੀ ਮੀਟਿੰਗ ਕੀਤੀ ਅਤੇ ਵਿਸਤਾਰ ਨਾਲ ਇਸ ਘਟਨਾ ਬਾਰੇ ਵਿਚਾਰ ਵਟਾਂਦਰਾ ਕੀਤਾ ਕਿ ਕਿਸਦੀ ਸ਼ਾਜਿਸ਼ ਨਾਲ ਇਹ ਘਟਨਾ ਹੋਈ। ਇਸ ’ਤੇ ਕਾਰਵਾਈ ਕਰਦਿਆਂ ਕਟਕ ਦੀ ਪੁਲਿਸ ਵੱਲੋਂ ਮਯੂਰਭੰਜ ਦੀ ਪੁਲਿਸ ਦੇ ਸਹਿਯੋਗ ਨਾਲ ਉਕਤ ਵਿਅਕਤੀ ਦੇ ਪਿੰਡ ਤੋਂ ਉਸ ਦੇ ਪਰਿਵਾਰ ਅਤੇ ਪਿੰਡ ਦੇ ਸਰਪੰਚ ਜਿੰਨ੍ਹਾਂ ’ਚ ਭੁਵਨੇਸ਼ਵਰ ਦਾ ਵੀ ਇੱਕ ਵਿਅਕਤੀ ਸ਼ਾਮਲ ਸੀ ਨੂੰ ਵੀ ਥਾਣੇ ਬੁਲਾਇਆ, ਜਿਸ ਤੋਂ ਗੁਰਦੁਆਰਾ ਸਾਹਿਬ ਦੀ ਕਮੇਟੀ ਸਾਹਮਣੇ ਸਾਰੀ ਪੁੱਛ ਗਿੱਛ ਕੀਤੀ। ਪੁੱਛ ਗਿੱਛ ਦੌਰਾਨ ਉਗ੍ਰਸੇਨ ਦੇ ਪਰਿਵਾਰ ਅਤੇ ਪਿੰਡ ਦੇ ਸਰਪੰਚ ਨੇ ਦੱਸਿਆ ਕਿ ਇਹ ਕਾਫੀ ਚਿਰ ਤੋਂ ਦਿਮਾਗੀ ਬਿਮਾਰ ਹੈ। ਪਰਿਵਾਰ ਅਤੇ ਸਰਪੰਚ ਦੇ ਬਿਆਨਾਂ ਉਪਰੰਤ ਪੁਲਿਸ ਨੇ ਉਸ ਨੂੰ ਆਪਣੀ ਹਿਰਾਸਤ ’ਚ ਲੈ ਕੇ ਐਸ.ਸੀ.ਬੀ. ਮੈਡੀਕਲ ਹਸਪਤਾਲ ਜਾਂਚ ਲਈ ਦਾਖਲ ਕਰਵਾ ਦਿਤਾ। ਸ਼ੁਰੂੁਆਤੀ ਜਾਂਚ ’ਚ ਡਾਕਟਰਾਂ ਨੇ ਦੱਸਿਆ ਕਿ ਇਹ ਬੰਦਾ ਦਿਮਾਗੀ ਤੌਰ ’ਤੇ ਬਿਮਾਰ ਹੈ, ਜਿਸਦੀ ਜਲਦ ਹੀ ਰਿਪੋਰਟ ਦੇ ਦਿੱਤੀ ਜਾਵੇਗੀ। ਰਿਪੋਰਟ ਆਉਣ ’ਤੇ ਪੁਲਿਸ ਉਕਤ ਵਿਅਕਤੀ ਨੂੰ ਮਜਿਸਟ੍ਰੇਟ ਕੋਲ ਪੇਸ਼ ਕਰੇਗੀ।