ਲੁਧਿਆਣਾ 26 ਫਰਵਰੀ – ਪੰਜਾਬ ਦੇ ਅਗਾਂਹਵਧੂ ਮੱਛੀ ਪਾਲਕਾਂ ਦੀ ਜਥੇਬੰਦੀ ਇਨੋਵੇਟਿਵ ਫਿਸ਼ ਫਾਰਮਰਜ਼ ਐਸੋਸੀਏਸ਼ਨ ਦੀ ਮਹੀਨਾਵਾਰ ਮਿਲਣੀ ਗੁਰੂ ਅੰਗਦ ਦੇਵ ਵੈਟਨਰੀ ਅਤੇ ਐਨੀਮਲ ਸਾਇੰਸਜ਼ ਯੂਨੀਵਰਸਿਟੀ, ਲੁਧਿਆਣਾ ਵਿਖੇ ਹੋਈ ਜਿਸ ਵਿਚ ਪੰਜਾਬ ਦੇ ਵੱਖੋ-ਵੱਖਰੇ ਇਲਾਕਿਆਂ ਤੋਂ 30 ਕਿਸਾਨਾਂ ਨੇ ਹਿੱਸਾ ਲਿਆ।ਸਰਦੀ ਤੋਂ ਗਰਮੀ ਵੱਲ ਜਾ ਰਹੇ ਮੌਸਮ ਨੂੰ ਧਿਆਨ ਵਿਚ ਰੱਖਦੇ ਹੋਏ ਡਾ. ਅਭਿਸ਼ੇਕ ਸ੍ਰੀਵਾਸਤਵ ਨੇ ਇਸ ਵਿਚਕਾਰਲੇ ਮੌਸਮ ਤੋਂ ਗਰਮੀ ਦੀ ਤਬਦੀਲੀ ਸੰਬੰਧੀ
ਮੱਛੀ ਪਾਲਕਾਂ ਨੂੰ ਮੱਛੀ ਦੀ ਸਾਂਭ ਸੰਭਾਲ ਸੰਬੰਧੀ ਸਿੱਖਿਅਤ ਕੀਤਾ।ਪਾਣੀ ਦੀ ਕਵਾਲਿਟੀ, ਬਿਮਾਰੀ ਪ੍ਰਬੰਧਨ ਅਤੇ ਖੁਰਾਕ ਵਿਚ ਤਬਦੀਲੀ ਬਾਰੇ ਦੱਸਿਆ ਗਿਆ ਤਾਂ ਜੋ ਵੱਧਦੇ ਤਾਪਮਾਨ ਵਿਚ ਮੱਛੀਆਂ ਨੂੰ ਸਹੀ ਸੰਭਾਲ ਦਿੱਤੀ ਜਾ ਸਕੇ।ਡਾ. ਅਮਿਤ ਮੰਡਲ ਨੇ ਖੁਰਾਕੀ ਪ੍ਰਬੰਧਨ ਰਾਹੀਂ ਮੱਛੀ ਦਾ ਸਿਹਤਮੰਦ ਉਤਪਾਦਨ ਲੈਣ ਬਾਰੇ ਚਰਚਾ ਕੀਤੀ।ਮੱਛੀ ਦਾ ਉਤਪਾਦਨ ਵਧਾਉਣ ਸੰਬੰਧੀ ਵੀ ਮੱਛੀ ਪਾਲਕਾਂ ਨੂੰ ਨੁਕਤੇ ਦੱਸੇ ਗਏ। ਡਾ. ਪ੍ਰਭਜੀਤ ਸਿੰਘ ਨੇ ਇਸ ਮੀਟਿੰਗ ਦਾ ਸੰਯੋਜਨ ਕੀਤਾ ਅਤੇ ਤਲਾਬ ਨੂੰ ਸਾਫ ਸੁਥਰਾ ਰੱਖਣ ਅਤੇ ਗਾਰ ਕੱਢਣ ਸੰਬੰਧੀ ਕਿਸਾਨਾਂ ਨੂੰ ਜਾਗਰੂਕ ਕੀਤਾ।ਵਿਭਾਗ ਦੇ ਮੁਖੀ, ਡਾ. ਮੀਰਾ ਡੀ ਆਂਸਲ ਨੇ ਮੱਛੀ ਪਾਲਕਾਂ ਨੂੰ ਕਿਹਾ ਕਿ ਬਹਾਰ ਦੇ ਮੌਸਮ ਵਿਚ ਮੱਛੀ ਨੂੰ ਬਿਮਾਰੀ ਲੱਗਣ ਦਾ ਖ਼ਤਰਾ ਅਤੇ ਪਰਜੀਵੀਆਂ ਦਾ ਹਮਲਾ ਵਧ ਜਾਂਦਾ ਹੈ ਇਸ ਲਈ ਸਾਨੂੰ ਜ਼ਿਆਦਾ ਸੁਚੇਤ ਰਹਿਣ ਦੀ ਲੋੜ ਹੈ। ਫ਼ਿਸ਼ਰੀਜ਼ ਕਾਲਜ ਦੇ ਡੀਨ, ਡਾ. ਕੁਲਬੀਰ ਸਿੰਘ ਸੰਧੂ ਨੇ ਕਿਸਾਨਾਂ ਨੂੰ ਕਿਹਾ ਕਿ ਉਹ ਯੂਨੀਵਰਸਿਟੀ ਦੇ ਮਾਹਿਰਾਂ ਦੇ ਸੰਪਰਕ ਵਿਚ ਰਹਿਣ ਅਤੇ ਕਿਸੇ ਵੀ ਉਲਝਣ ਜਾਂ ਸਮੱਸਿਆ ਸਮੇਂ ਮਾਹਿਰਾਂ ਨਾਲ ਰਾਏ ਕਰਨ।ਨਿਰਦੇਸ਼ਕ ਪਸਾਰ ਸਿੱਖਿਆ, ਡਾ. ਹਰੀਸ਼ ਕੁਮਾਰ ਵਰਮਾ ਨੇ ਕਾਲਜ ਦੀ ਸ਼ਲਾਘਾ ਕੀਤੀ ਕਿ ਉਹ ਇਸ ਕਿਸਮ ਦੀਆਂ ਮਹੀਨਾਵਾਰ ਮੀਟਿੰਗਾਂ ਕਰਵਾ ਕੇ ਕਿਸਾਨਾਂ ਨੂੰ ਜਾਗਰੂਕ ਕਰ ਰਹੇ ਹਨ।ਉਨ੍ਹਾਂ ਕਿਹਾ ਕਿ ਕਿਸਾਨ ਇਸ ਤਰ੍ਹਾਂ ਦੇ ਮੰਚ ਤੇ ਆ ਕੇ ਬਹੁਤ ਕੁਝ ਨਵਾਂ ਸਿੱਖਦਾ ਹੈ।ਉਨ੍ਹਾਂ ਕਿਸਾਨਾਂ ਨੂੰ ਇਹ ਵੀ ਜਾਣਕਾਰੀ ਦਿੱਤੀ ਕਿ ਉਹ 20-21 ਮਾਰਚ ਨੂੰ ਯੂਨੀਵਰਸਿਟੀ ਵਿਖੇ ਲੱਗ ਰਹੇ ਪਸ਼ੂ ਪਾਲਣ ਮੇਲੇ ਵਿਚ ਜਰੂਰ ਪਹੁੰਚਣ ਤਾਂ ਕਿ ਉਥੇ ਸਾਰੇ ਮਾਹਿਰਾਂ ਨੂੰ ਇਕੱਠੇ ਮਿਲ ਕੇ ਹਰ ਤਰੀਕੇ ਦਾ ਗਿਆਨ ਲੈ ਸਕਣ।