ਹਰਿਆਣਾ ਦੇ ਨੂਹ ਜ਼ਿਲ੍ਹੇ ਵਿਚ ਬੀਜੇਪੀ ਅਤੇ ਜੇਜੇਪੀ ਵਰਕਰਾਂ ਵਿਚਾਲ ਖੂਨੀ ਝੜਪ ਹੋ ਗਈ। ਬੀਜੇਪੀ ਦੇ ਉਮੀਦਵਾਰ ਵੱਲੋਂ ਰੋਡ ਸ਼ੌਅ ਕੱਢਿਆ ਜਾ ਰਿਹਾ ਸੀ। ਜਦੋਂ ਇਹ ਰੋਡ ਸ਼ੋਅ ਜੇਜੇਪੀ ਉਮੀਦਵਾਰ ਦੇ ਦਫਤਰ ਦੇ ਅੱਗੋਂ ਦੀ ਲੰਘਿਆ ਤਾਂ ਦੋਵਾਂ ਪਾਰਟੀਆਂ ਦੇ ਵਰਕਰ ਆਪਸ ਵਿਚ ਭਿੜ ਗਏ।
ਵੀਰਵਾਰ ਨੂੰ ਦੁਪਹਿਰ ਸਮੇਂ ਨੂਹ ਵਿਚ ਬੀਜੇਪੀ-ਜੇਜਪੀ ਦੇ ਵਰਕਰ ਵੱਡੀ ਗਿਣਤੀ ਵਿਚ ਆਪਣੇ ਨੇਤਾਵਾਂ ਦੇ ਨਾਮਜ਼ਦਗੀ ਪੇਪਰ ਦਾਖਲ ਕਰਨ ਲਈ ਜਾ ਰਹੇ ਸਨ। ਜਦੋਂ ਬੀਜੇਪੀ ਵਰਕਰ ਗੁਰੂਗ੍ਰਾਮ-ਅਲਵਰ ਮਾਰਗ ਦੇ ਜੇਜਪੀ ਦੇ ਦਫਤਰ ਸਾਹਮਣਿਉਂ ਲੰਘ ਰਹੇ ਸਨ ਤਾਂ ਦੋਵਾਂ ਪਾਰਟੀਆਂ ਦੇ ਵਰਕਰਾਂ ਵਿਚ ਲੜਾਈ ਹੋ ਗਈ। ਇਸ ਲੜਾਈ ਵਿਚ ਲਾਠੀ-ਡੰਡਿਆਂ ਦੇ ਨਾਲ ਪੱਥਰਬਾਜ਼ੀ ਵੀ ਹੋਈ। ਇਸ ਦੌਰਾਨ ਅੱਧੀ ਦਰਜਨ ਗੱਡੀਆਂ ਵਿਚ ਭੰਨਤੋੜ ਹੋਈ ਅਤੇ ਕਈ ਵਰਕਰਾਂ ਨੂੰ ਸੱਟਾਂ ਵੀ ਵੱਜੀਆਂ।
ਦੱਸਣਯੋਗ ਹੈ ਕਿ ਅੱਜ ਭਾਜਪਾ ਨੇਤਾ ਚੌਧਰੀ ਜ਼ਾਕਿਰ ਹੁਸੈਨ ਅਤੇ ਜੇਜੇਪੀ ਦੇ ਉਮੀਦਵਾਰ ਤਾਇਬ ਹੁਸੈਨ ਘਾਸੇੜਿਆ ਨੇ ਆਪਣਾ ਨਾਮਜ਼ਦਗੀ ਪੱਤਰ ਦਾਖਲ ਕਰਨਾ ਸੀ। ਦੋਵਾਂ ਪਾਰਟੀਆਂ ਦੇ ਨੇਤਾ ਆਪਣੇ ਵਰਕਰਾਂ ਨੂੰ ਇਕੱਠਾ ਕਰਕੇ ਆਪਣਾ ਸ਼ਕਤੀ ਪ੍ਰਦਰਸ਼ਨ ਕੀਤਾ ਸੀ। ਝਗੜੇ ਦੌਰਾਨ ਸੜਕ ਉਪਰ ਜਾਮ ਲੱਗ ਗਿਆ। ਇਸ ਤੋਂ ਬਾਅਦ ਦੋਵਾਂ ਪਾਰਟੀਆਂ ਦੇ ਵਰਕਰ ਦੁਬਾਰਾ ਫਿਰ ਬੱਸ ਅੱਡੇ ਕੋਲ ਭਿੜ ਪਏ। ਬਾਅਦ ਵਿਚ ਪੁਲਿਸ ਨੇ ਮੌਕੇ ਉਤੇ ਪੁਜ ਕੇ ਸਥਿਤੀ ਨੂੰ ਕਾਬੂ ਕੀਤਾ, ਪਰ ਤਣਾਅ ਹਾਲੇ ਵੀ ਜਾਰੀ ਹੈ।
