ਦੇਸ਼ ਦੀ ਆਰਥਿਕਤਾ ਨੂੰ ਲੈ ਕੇ ਚਾਰੋ ਪਾਸੇ ਪੈਦਾ ਹੋਈ ਚਿੰਤਾ ਤੋਂ ਸਰਕਾਰ ਜਾਣੂ ਹੈ। ਇਸ ਦੇ ਚੱਲਦਿਆਂ ਇੱਕ ਹਫ਼ਤੇ ‘ਚ ਦੂਸਰੀ ਵਾਰ ਅਰਥ ਵਿਵਸਥਾ ‘ਤੇ ਸਪਸ਼ਟੀਕਰਨ ਦਿੱਤਾ ਗਿਆ ਹੈ। ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਨ ਨੇ ਅੱਜ ਘਰੇਲੂ ਆਰਥਿਕਤਾ ਨੂੰ ਲੈ ਕੇ ਪ੍ਰੈੱਸ ਕਾਨਫ਼ਰੰਸ ਕਰਦਿਆਂ ਕਿਹਾ ਕਿ ਦੇਸ਼ ਦੀ ਆਰਥਿਕਤਾ ਸਹੀ ਸਥਿਤੀ ‘ਚ ਹੈ। ਉਨ੍ਹਾਂ ਬੈਂਕਾਂ ਦੀ ਚੰਗੀ ਸਥਿਤੀ ਦੇ ਬਾਰੇ ‘ਚ ਕਿਹਾ ਕਿ ਉਨ੍ਹਾਂ ਦੇ ਐਨ.ਪੀ.ਏ ਘੱਟ ਗਏ ਹਨ ਅਤੇ ਮੁਨਾਫ਼ਾ ਵਧਿਆ ਹੈ ਜੋ ਕਿ ਚੰਗੀ ਖ਼ਬਰ ਹੈ। ਇਸ ਦੇ ਨਾਲ ਹੀ ਵਿੱਤ ਮੰਤਰੀ ਨੇ ਬੈਂਕਾਂ ਦੇ ਲਈ ਵੱਡਾ ਐਲਾਨ ਕਰਦੇ ਹੋਏ ਕਿਹਾ ਕਿ 10 ਵੱਡੇ ਬੈਂਕਾਂ ਨੂੰ ਮਿਲਾ ਕੇ 4 ਬੈਂਕਾਂ ਦਾ ਗਠਨ ਕੀਤਾ ਜਾਵੇਗਾ ਅਤੇ ਇਸ ਦੇ ਲਈ 4 ਰਲੇਵੇਂ ਕੀਤੇ ਜਾਣਗੇ। ਬੈਂਕਾਂ ਦੇ ਪਹਿਲੇ ਰਲੇੇਵੇਂ ‘ਚ ਪੰਜਾਬ ਨੈਸ਼ਨਲ ਬੈਂਕ, ਯੂਨਾਈਟਿਡ ਅਤੇ ਓਰੀਐਂਟਲ ਬੈਂਕ ਦਾ ਰਲੇਵਾਂ ਹੋਵੇਗਾ। ਬੈਂਕਾਂ ਦੇ ਦੂਸਰੇ ਰਲੇਵੇਂ ‘ਚ ਯੂਨੀਅਨ ਬੈਂਕ, ਆਂਧਰਾ ਬੈਂਕ ਅਤੇ ਕਾਰਪੋਰੇਸ਼ਨ ਬੈਂਕ ਦਾ ਰਲੇਵਾਂ ਹੋਵੇਗਾ। ਬੈਂਕਾਂ ਦੇ ਤੀਸਰੇ ਰਲੇਵੇਂ ‘ਚ ਕੈਨਰਾ ਬੈਂਕ, ਸਿੰਡੀਕੇਟ ਬੈਂਕ ਦਾ ਰਲੇਵਾਂ ਹੋਵੇਗਾ ਅਤੇ ਚੌਥੇ ਰਲੇਵੇਂ ਤਹਿਤ ਇੰਡੀਅਨ ਬੈਂਕ ਅਤੇ ਅਲਾਹਾਬਾਦ ਬੈਂਕ ਦਾ ਰਲੇਵਾਂ ਹੋਵੇਗਾ।