ਨਰੋਆ ਪੰਜਾਬ ਮੰਚ ਵੱਲੋਂ ਦਰਿਆਵਾਂ ‘ਚ ਸੁੱਟੇ ਜਾ ਰਹੇ ਫੈਕਟਰੀਆਂ ਦੇ ਗੰਧਲੇ ਪਾਣੀ ਤੇ ਹੋਰ ਫਾਲਤੂ ਸਮਾਨ ਦੇ ਵਿਰੋਧ ‘ਚ ਕੱਢੇ ਗਏ ਚੇਤਨਾ ਮਾਰਚ ਤੋਂ ਲੋਕਾਂ ਨੂੰ ਪ੍ਰੇਰਨਾ ਮਿਲਣੀ ਸ਼ੁਰੂ ਹੋ ਗਈ ਹੈ । ਮੰਚ ਨਾਲ ਸਹਿਮਤੀ ਪ੍ਰਗਟਾਉਂਦਿਆਂ ਰਾਜਸਥਾਨ ਦੇ 9 ਜਿਲ੍ਹਿਆਂ ਦੇ ਵਸਨੀਕਾਂ ਨੇ ਇਸ ਮਾਮਲੇ ਚ ਪੰਜਾਬ ਸਰਕਾਰ, ਨੈਸ਼ਨਲ ਗ੍ਰੀਨ ਟ੍ਰਿਬਿਊਨਲ ਤੇ ਪ੍ਰਦੂਸ਼ਣ ਕੰਟਰੋਲ ਬੋਰਡ ਦੇ ਵਿਰੋਧ ਚ ਪੰਜਾਬ ਤੇ ਹਰਿਆਣਾ ਹਾਈਕੋਰਟ ਦੇ ਨਾਲ ਨਾਲ ਰਾਜਸਥਾਨ ਹਾਈਕੋਰਟ ਦਾ ਵੀ ਦਰਵਾਜਾ ਖੜਕਾਉਣ ਦਾ ਫੈਸਲਾ ਕੀਤਾ ਹੈ । ਭਾਈ ਘਨ੍ਹੱਈਆ ਕੈਂਸਰ ਰੋਕੋ ਸੇਵਾ ਸੁਸਾਇਟੀ ਦੇ ਸੰਸਥਾਪਕ ਅਤੇ ਨਰੋਆ ਮੰਚ ਦੇ ਕੋਆਰਡੀਨੇਟਰ ਗੁਰਪ੍ਰੀਤ ਸਿੰਘ ਚੰਦਬਾਜਾ ਸਮੇਤ ਉਨ੍ਹਾਂ ਦੀ ਅਗਵਾਈ ਵਾਲੀ ਸਮੁੱਚੀ ਟੀਮ ਨੂੰ ਰਾਜਸਥਾਨ ਤੋਂ ਉਚੇਚੇ ਤੌਰ ਤੇ ਮਿਲਣ ਲਈ ਪੁੱਜੇ । ਮਹੇਸ਼ ਪੇਡੀਵਾਲ ਗੰਗਾਨਗਰ,ਹਰਵਿੰਦਰ ਸਿੰਘ ਸੰਧੂ, ਰਮਜਾਨ ਅਲੀ ਚੋਪਦਾਰ, ਸੁਰਿੰਦਰ ਪਾਰਿਕ ਅਤੇ ਵਿਸ਼ਾਲ ਨਾਗਪਾਲ ਆਦਿ ਨੇ ਵਿਸ਼ਵਾਸ ਦੁਆਇਆ ਕਿ ਗੰਗਾਨਗਰ ਸਮੇਤ ਰਾਜਸਥਾਨ ਦੇ ਲਗਭਗ 9 ਜਿਲ੍ਹਿਆਂ ਦੇ ਵਸਨੀਕ ਇਸ ਸੰਘਰਸ਼ ਚ ਸ਼ਾਮਲ ਹੋਣਗੇ ਕਿਉਂਕਿ ਸਰਕਾਰ ਅਤੇ ਸੰਬੰਧਿਤ ਵਿਭਾਗ ਦੀ ਅਣਗਹਿਲੀ ਦਾ ਖਮਿਆਜ਼ਾ 9 ਜਿਲ੍ਹਿਆਂ ਦੇ ਵਸਨੀਕਾਂ ਨੂੰ ਭੁਗਤਣਾ ਪੈ ਰਿਹਾ ਹੈ ।ਗੰਧਲੇ ਪਾਣੀ ਦੀ ਸਪਲਾਈ ਕਾਰਨ ਉਥੋਂ ਦੇ ਲੋਕ ਕੈਂਸਰ , ਕਾਲਾ ਪੀਲੀਆ ਸਮੇਤ ਪੇਟ ਦੀਆਂ ਅਨੇਕਾਂ ਬਿਮਾਰੀਆਂ ਦਾ ਸ਼ਿਕਾਰ ਹੋ ਰਹੇ ਹਨ । ਉਨ੍ਹਾਂ ਨਰੋਆ ਪੰਜਾਬ ਮੰਚ ਦੀ 9 ਜੂਨ ਨੂੰ ਜਲੰਧਰ ਵਿਖੇ ਹੋਣ ਵਾਲੀ ਮੀਟਿੰਗ ਚ ਵੀ ਭਰਵੀਂ ਸ਼ਮੂਲੀਅਤ ਕਰਨ ਦਾ ਐਲਾਨ ਕੀਤਾ ।ਇਸ ਮੌਕੇ ਕੁਲਤਾਰ ਸਿੰਘ ਸੰਧਵਾਂ, ਸਵਰਨ ਸਿੰਘ ਦਾਨੇਵਾਲੀਆ,ਡਾ. ਦਵਿੰਦਰ ਸੈਫੀ, ਜਗਤਾਰ ਸਿੰਘ ਗਿੱਲ , ਰਾਜਿੰਦਰ ਸਿੰਘ ਬਰਾੜ, ਸ਼ਵਿੰਦਰ ਸਿੰਘ ਸੰਧੂ ਅਤੇ ਹੋਰ ਹਾਜ਼ਰ ਸਨ ।