ਲੰਘੇ ਦਿਨ ਪਿੰਡ ਕਲਿੱਤਰਾ ਤਹਿਸੀਲ ਨੰਗਲ ‘ਚ ਸਤਲੁਜ ਦਰਿਆ ‘ਚ ਵਾਧੂ ਪਾਣੀ ਆਉਣ ਕਾਰਨ ਗੁੱਜਰ ਭਾਈਚਾਰੇ ਦੀਆਂ ਲਗਭਗ 81 ਮੱਝਾਂ ਰੁੜ੍ਹ ਗਈਆਂ ਸਨ। ਇਸੇ ਸੰਬੰਧ ‘ਚ ਅੱਜ ਵਿਧਾਨ ਸਭਾ ਸਪੀਕਰ ਰਾਣਾ ਕੇ. ਪੀ. ਸਿੰਘ ਅਤੇ ਜ਼ਿਲ੍ਹਾ ਪ੍ਰਸ਼ਾਸਨ ਦੇ ਉੱਚ ਅਧਿਕਾਰੀਆਂ ਵਲੋਂ ਪਿੰਡ ਕਲਿੱਤਰਾ ‘ਚ ਘਟਨਾ ਸਥਾਨ ਦਾ ਦੌਰਾ ਕੀਤਾ ਗਿਆ। ਜ਼ਿਕਰਯੋਗ ਹੈ ਕਿ ਗੁੱਜਰ ਭਾਈਚਾਰੇ ਦੇ ਕਈ ਪਰਿਵਾਰ ਹਰ ਸਾਲ ਪਿੰਡ ‘ਚ ਸਤਲੁਜ ਦਰਿਆ ਦੇ ਕੰਢੇ ਆਪਣੀਆਂ ਸੈਂਕੜੇ ਮੱਝਾਂ ਲੈ ਕੇ ਆਉਂਦੇ ਹਨ। ਲੰਘੇ ਦਿਨ ਜਦੋਂ ਬਿਕਾ, ਬਿੱਲਾ ਅਤੇ ਸੁਖਦੇਵ ਨਾਮੀ ਵਿਅਕਤੀ ਆਪਣੀਆਂ ਮੱਝਾਂ ਲੈ ਕੇ ਸਤਲੁਜ ਦਰਿਆ ‘ਚ ਗਏ ਤਾਂ ਅਚਾਨਕ ਹੀ ਵਾਧੂ ਪਾਣੀ ਆ ਗਿਆ, ਜਿਸ ‘ਚ ਲਗਭਗ 81 ਮੱਝਾਂ ਰੁੜ੍ਹ ਗਈਆਂ। ਪਿੰਡ ਵਾਸੀਆਂ ਦੇ ਸਹਿਯੋਗ ਨਾਲ ਕੁਝ ਮ੍ਰਿਤਕ ਮੱਝਾਂ ਨੂੰ ਪਾਣੀ ‘ਚੋਂ ਬਾਹਰ ਕੱਢ ਲਿਆ ਗਿਆ ਹੈ ਅਤੇ ਬਾਕੀਆਂ ਦੀ ਭਾਲ ਜਾਰੀ ਹੈ। ਇਸ ਮੌਕੇ ਵਿਧਾਨ ਸਭਾ ਸਪੀਕਰ ਰਾਣਾ ਕੇ. ਪੀ. ਨੇ ਪੀੜਤ ਪਰਿਵਾਰਾਂ ਨੂੰ ਭਰੋਸਾ ਦਿੱਤਾ ਕਿ ਉਨ੍ਹਾਂ ਦੀ ਪੂਰੀ-ਪੂਰੀ ਮਦਦ ਕੀਤੀ ਜਾਵੇਗੀ। ਇਸ ਦੌਰਾਨ ਉਨ੍ਹਾਂ ਨਾਲ ਤਹਿਸੀਲਦਾਰ ਨੰਗਲ ਇੰਦਰਦੇਵ ਸਿੰਘ ਅਤੇ ਹੋਰ ਪ੍ਰਸ਼ਾਸਨਿਕ ਅਧਿਕਾਰੀ ਵੀ ਹਾਜ਼ਰ ਸਨ। ਇਸ ਘਟਨਾ ਨੂੰ ਲੈ ਕੇ ਪਿੰਡ ਵਾਸੀਆਂ ‘ਚ ਭਾਰੀ ਰੋਹ ਪਾਇਆ ਜਾ ਰਿਹਾ ਹੈ।