ਬਠਿੰਡਾ-(ਵੀਰਪਾਲ)- ਸਾਬਕਾ ਮੁੱਖ ਮੰਤਰੀ ਦੇ ਦੌਰੇ ਦੌਰਾਨ ਅਕਾਲੀ ਵਰਕਰ ਦੇ ਰੈਸਟ ਹਾਊਸ ‘ਚ ਠਹਿਰਾ ਦੌਰਾਨ ਐਸ ਐਚ ਓ ਭੁਪਿੰਦਰ ਸਿੰਘ ਦੇ ਸਾਥੀ ਦੇ ਰਿਵਾਲਵਰ ਸਮੇਤ ਦਾਖਲ ਹੋਏ ਵਿਅਕਤੀ ਅਤੇ ਐਸ ਐਚ ਓ ਭੁਪਿੰਦਰ ਸਿੰਘ ਖਿਲਾਫ ਐਸ ਐਸ ਪੀ ਬਠਿੰਡਾ ਡਾ. ਨਾਨਕ ਸਿੰਘ ਨੇ ਵਿਭਾਗੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਦੱਸਣਯੋਗ ਹੈ ਕਿ 8 ਨਵੰਬਰ ਨੂੰ ਪਿੰਡ ਘੁੱਦਾ ਵਿਖੇ ਸਥਿਤ ਇੱਕ ਪੈਟ੍ਰੋਲ ਪੰਪ ‘ਤੇ ਜਦ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਅਕਾਲੀ ਵਰਕਰ ਨੂੰ ਮਿਲਣ ਲਈ ਪਹੰੁਚੇ ਤਾਂ ਥਾਣਾ ਨੰਦਗੜ ਮੁਖੀ ਇੰਸਪੈਕਟਰ ਭੁਪਿੰਦਰ ਸਿੰਘ ਸਿਵਲ ਵਰਦੀ ‘ਚ ਆਏ ਅਤੇ ਉਨਾਂ ਦਾ ਇੱਕ ਪ੍ਰਾੲਂਵੇਟ ਨੌਕਰ ਸਰਕਾਰੀ ਅਸਲਾ ਲੈ ਕੇ ਉਸ ਕਮਰੇ ’ਚ ਦਾਖਲ ਹੋ ਗਿਆ , ਜਿੱਥੇ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਬੈੇਠੇ ਸਨ। ਪ੍ਰਕਾਸ਼ ਸਿੰਘ ਬਾਦਲ ਦੀ ਸੁਰੱਖਿਆ ’ਚ ਤੈਨਾਤ ਪੁਲਿਸ ਅਧਿਕਾਰੀ ਹਰਮੀਕ ਸਿੰਘ ਦਿਓਲ ਨੇ ਉਕਤ ਥਾਣਾ ਮੁਖੀ ਦੇ ਪ੍ਰਾਈਵੇਟ ਨੌਕਰ ਨੂੰ ਸਰਕਾਰੀ ਅਸਲੇ ਸਮੇਤ ਹਿਰਾਸਤ ’ਚ ਲੈ ਲਿਆ ਸੀ, ਜਿਸਦੀ ਪਹਿਚਾਣ ਪਾਲੀ ਨਾਮ ਨਾਲ ਹੋਈ ਹੈ ਅਤੇ ਉਸ ਤੋਂ ਫੜਿਆ ਗਿਆ ਰਿਵਾਲਵਰ ਐਸ ਐਚ ਓ ਭੁਪਿੰਦਰ ਸਿੰਘ ਦਾ ਹੈ, ਜਿਸਨੂੰ ਕਿ ਲਾਈਨ ਹਾਜ਼ਰ ਕਰ ਦਿੱਤਾ ਗਿਆ ਸੀ। ਇਸ ਮਾਮਲੇ ’ਤੇ ਕਾਰਵਾਈ ਕਰਦਿਆਂ ਐਸ ਐਸ ਪੀ ਬਠਿੰਡਾ ਡਾ. ਨਾਨਕ ਸਿੰਘ ਵੱਲੋਂ ਵਿਭਾਗੀ ਕਾਰਵਾਈ ਕਰਦਿਆਂ ਡੂੰਘਾਈ ਨਾਲ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ।