ਨੈਸ਼ਨਲ ਡੈਸਕ— ਬਲਾਤਕਾਰ ਮਾਮਲੇ ‘ਚ ਦੋਸ਼ੀ ਦਾਤੀ ਮਹਾਰਾਜ ਨੇ ਖੁਦ ਨੂੰ ਨਿਰਦੋਸ਼ ਦੱਸਿਆ। ਉਨ੍ਹਾਂ ਨੇ ਬੁੱਧਵਾਰ ਨੂੰ ਪ੍ਰੈਸ ਕਾਨਫਰੰਸ ਕਰਕੇ ਕਿਹਾ ਕਿ ਮੈਂ ਭਗੋੜਾ ਨਹੀਂ ਹਾਂ। ਮੈਨੂੰ ਅਦਾਲਤ ‘ਤੇ ਵਿਸ਼ਵਾਸ ਹੈ ਅਤੇ ਮੈਂ ਪੁਲਸ ਜਾਂਚ ‘ਚ ਸਹਿਯੋਗ ਕਰਾਂਗਾ। ਦਾਤੀ ਮਹਾਰਾਜ ਨੇ ਕਿਹਾ ਕਿ ਮੇਰਾ ਗੁਨਾਹ ਹੋਵੇ ਤਾਂ ਫਾਂਸੀ ਦੇ ਦਿਓ, ਕੁਝ ਨਹੀਂ ਕਹਾਂਗਾ ਪਰ ਨਾਰੀ ਦਾ ਅਪਮਾਨ ਨਹੀਂ ਹੋਣ ਦਵਾਂਗਾ।
ਦਾਤੀ ਨੇ ਸਫਾਈ ਦਿੰਦੇ ਹੋਏ ਕਿਹਾ ਕਿ ਇਹ ਮਾਮਲਾ ਪੈਸਿਆਂ ਦਾ ਹੈ। ਕੁਝ ਲੋਕ ਮੇਰੇ ਖਿਲਾਫ ਸਾਜਿਸ਼ ਕਰ ਰਹੇ ਹਨ। ਉਨ੍ਹਾਂ ਨੇ ਕਿਹਾ ਕਿ ਮੈਂ ਪੁਲਸ ਦੇ ਸਾਹਮਣੇ ਆਪਣਾ ਪੱਖ ਰੱਖਿਆ। ਜਾਂਚ ‘ਚ ਜਦੋਂ ਵੀ ਬੁਲਾਇਆ ਜਾਵੇਗਾ। ਮੈਂ ਮੌਜੂਦ ਰਹਾਂਗਾ। ਮੈਂ ਬੇਟੀਆਂ ਦਾ ਬਾਪ ਹਾਂ, ਨਾਰੀ ਦੇ ਨਾਮ ‘ਤੇ ਕਲੰਕ ਨਾ ਲਗਾਇਆ ਜਾਵੇ। ਬਲਾਤਾਕਰ ਕੇਸ ਦਰਜ ਹੋਣ ਦੇ ਬਾਅਦ ਅੰਡਰ ਗਰਾਊਂਡ ਚੱਲ ਰਹੇ ਦਾਤੀ ਮਹਾਰਾਜ ਮੰਗਲਵਾਰ ਦੁਪਹਿਰ ਚਾਣਕਿਆਪੁਰੀ ਸਥਿਤ ਕ੍ਰਾਇਮ ਬ੍ਰਾਂਚ ਦਫਤਰ ਪੁੱਜੇ। ਜਿੱਥੇ ਉਨ੍ਹਾਂ ਤੋਂ 5 ਘੰਟੇ ਪੁੱਛਗਿਛ ਕੀਤੀ ਗਈ।