ਮੋਗਾ 30 ਸਤੰਬਰ 2023: ਅੱਜ ਕੱਲ੍ਹ ਹਰ ਇਨਸਾਨ ਦੇ ਜੀਵਨ ‘ਚ ਪੈਸਾ ਤੇ ਜ਼ਮੀਨ ਜਾਇਦਾਦ ਰਿਸ਼ਤਿਆਂ ਨਾਲੋਂ ਜਿਆਦਾ ਅਹਿਮੀਅਤ ਰਖਦੀਆਂ ਹਨ, ਇਥੋਂ ਤੱਕ ਜ਼ਮੀਨਾਂ ਪਿੱਛੇ ਕਤਲ ਹੁੰਦੇ ਵੀ ਦੇਖੇ ਗਏ ਹਨ। ਅਜਿਹੇ ਮਾਮਲੇ ਵੀ ਸਾਹਮਣੇ ਆਏ ਹਨ ਜਿੱਥੇ ਰਿਸ਼ਤਿਆਂ ਨਾਲੋਂ ਜਮੀਨ ਜਾਇਦਾਦ ਦਾ ਮੋਹ ਜਿਆਦਾ ਦੇਖਣ ਨੂੰ ਮਿਲਿਆ ਅਜਿਹਾ ਹੀ ਮਾਮਲਾ ਸਾਹਮਣੇ ਆਇਆ ਮੋਗਾ ਦੇ ਪਿੰਡ ਸਮਾਲਸਰ ਤੋਂ ਜਿੱਥੇ ਇਕ ਧੀ ਨੇ ਹੀ ਆਪਣੇ ਪੇਕਿਆਂ ਦੀ ਜ਼ਮੀਨ ਜਾਇਦਾਦ ਆਪਣੇ ਕਰਵਾ ਕੇ ਆਪਣੇ ਪਿਓ ਨੂੰ ਮਰਨ ਲਈ ਮਜਬੂਰ ਕਰ ਦਿੱਤਾ। ਇਸ ਧੀ ਨੇ ਆਪਣੇ ਪਤੀ ਨਾਲ ਮਿਲ ਕੇ ਆਪਣੇ ਪਿਓ ਦੀ 7 ਕਿਲੇ ਜ਼ਮੀਨ ਤੇ ਘਰ ਆਪਣੇ ਨਾਮ ਲਿਖਵਾ ਲਿਆ ਹੈ। ਇਸ ਕਾਰਨ ਬਿਰਧ ਬਾਪ ਨੇ ਜ਼ਹਿਰ ਖਾ ਕੇ ਜਾਨ ਦੇ ਦਿੱਤੀ।ਪੁਲਿਸ ਨੇ ਇਸ ਮਾਮਲੇ ਵਿਚ ਮ੍ਰਿਤਕ ਵਿਅਕਤੀ ਦੀ ਧੀ ਤੇ ਜਵਾਈ ਵਿਰੁੱਧ ਗ਼ਬਨ ਦੇ ਦੋਸ਼ਾਂ ਹੇਠ ਕੇਸ ਦਰਜ ਕਰ ਲਿਆ ਹੈ। ਜਾਣਕਾਰੀ ਦਿੰਦਿਆਂ ਮ੍ਰਿਤਕ ਦੇ ਲੜਕੇ ਜਸਕਰਨ ਸਿੰਘ ਨਿਵਾਸੀ ਭਲੂਰ ਨੇ ਦੱਸਿਆ ਕਿ ਉਸ ਦੀ ਭੈਣ ਛਿੰਦਰਪਾਲ ਤੇ ਜੀਜਾ ਸੁਖਦੇਵ ਸਿੰਘ ਨੇ ਪਿਤਾ ਬਲਵਿੰਦਰ ਸਿੰਘ ਨੂੰ ਝਾਂਸੇ ਵਿਚ ਲੈ ਕੇ ਉਸ ਦੀ 7 ਕਿੱਲੇ ਜ਼ਮੀਨ ਤੇ ਰਿਹਾਇਸ਼ੀ ਮਕਾਨ ਆਪਣੇ ਨਾਂ ਕਰਵਾ ਲਿਆ ਸੀ।
ਬਾਅਦ ਵਿਚ ਪਿਤਾ ਨੇ ਖੇਤ ਤੇ ਮਕਾਨ ਦੀ ਕੀਮਤ ਮੰਗੀ ਤਾਂ ਧੀ ਨੇ ਟਾਲਮਟੋਲ ਸ਼ੁਰੂ ਕਰ ਦਿੱਤੀ। ਸਭ ਕੁਝ ਹੱਥੋਂ ਜਾਂਦਾ ਵੇਖ ਕੇ ਪਿਤਾ ਨੇ ਦੁਖੀ ਹੋ ਕੇ ਜ਼ਹਿਰ ਨਿਗਲ ਲਿਆ ਸੀ। ਹਾਲਤ ਵਿਗੜਣ ’ਤੇ ਪਰਿਵਾਰ ਦੇ ਮੈਂਬਰ ਪਿਤਾ ਨੂੰ ਮੁੱਦਕੀ ਵਿਚ ਨਾਗੀ ਹਸਪਤਾਲ ਲੈ ਕੇ ਗਏ ਸਨ। ਹਾਲਤ ਗੰਭੀਰ ਹੋਣ ਕਾਰਨ ਡਾਕਟਰਾਂ ਨੇ ਪਿਤਾ ਨੂੰ ਮੈਡੀਕਲ ਕਾਲਜ ਲਈ ਰੈਫਰ ਕਰ ਦਿੱਤਾ ਗਿਆ, ਜਿੱਥੇ ਉਨ੍ਹਾਂ ਨੇ ਦਮ ਤੋੜ ਦਿੱਤਾ। ਪੁਲਿਸ ਨੇ ਇਸ ਮਾਮਲੇ ਵਿਚ ਛਿੰਦਰਪਾਲ ਕੌਰ ਤੇ ਉਸ ਦੇ ਪਤੀ ਸੁਖਦੇਵ ਸਿੰਘ ’ਤੇ ਕੇਸ ਦਰਜ ਕਰ ਲਿਆ ਹੈ।
