26 ਮਈ 2023-BSNL ਉਪਭੋਗਤਾਵਾਂ ਲਈ ਵੱਡੀ ਖੁਸ਼ਖਬਰੀ ਸਾਹਮਣੇ ਆਈ ਹੈ, ਬੀ ਐਸ ਐਨ ਐਲ ਉਪਭੋਗਤਾਵਾਂ ਲਈ ਜ਼ਲਦ ਹੀ 4 ਜੀ ਨੈਟਵਰਕ ਸ਼ੁਰੂ ਕਰਨ ਜਾ ਰਿਹਾ ਹੈ। ਕੇਂਦਰੀ ਆਈਟੀ ਅਤੇ ਸੰਚਾਰ ਮੰਤਰੀ ਅਸ਼ਵਿਨੀ ਵੈਸ਼ਨਵ ਦਾ ਕਹਿਣਾ ਹੈ ਕਿ ਬੀਐਸਐਨਐਲ 4ਜੀ ਦੋ ਹਫ਼ਤਿਆਂ ਚ ਲਾਂਚ ਕੀਤਾ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਬੀਐਸਐਨਐਲ ਜਲਦੀ ਹੀ 200 ਸਾਈਟਾਂ ਨਾਲ 4ਜੀ ਨੈੱਟਵਰਕ ਸ਼ੁਰੂ ਕਰੇਗਾ। ਇਸ ਦੇ ਨਾਲ ਹੀ ਤਿੰਨ ਮਹੀਨਿਆਂ ਦੇ ਟੈਸਟਿੰਗ ਤੋਂ ਬਾਅਦ ਇਹ ਪ੍ਰਤੀ ਦਿਨ ਔਸਤਨ 200 ਸਾਈਟਾਂ ਲਾਂਚ ਕਰੇਗਾ। ਇੰਨਾ ਹੀ ਨਹੀਂ ਕੇਂਦਰੀ ਮੰਤਰੀ ਨੇ ਕਿਹਾ ਕਿ ਬੀਐਸਐਨਐਲ ਦੇ 4ਜੀ ਨੈੱਟਵਰਕ ਨੂੰ ਨਵੰਬਰ-ਦਸੰਬਰ ਤੱਕ 5ਜੀ ਤੱਕ ਅੱਪਗ੍ਰੇਡ ਕਰ ਦਿੱਤਾ ਜਾਵੇਗਾ। ਇਸ ਤੋਂ ਇਲਾਵਾ ਕੇਂਦਰੀ ਮੰਤਰੀ ਵੈਸ਼ਨਵ ਦਾ ਕਹਿਣਾ ਹੈ ਕਿ ਅਸੀਂ ਭਾਰਤ ‘ਚ 4ਜੀ-5ਜੀ ਟੈਲੀਕਾਮ ਸਟੈਕ ਤਿਆਰ ਕੀਤਾ ਹੈ। ਇਨ੍ਹਾਂ ਸਟਾਕਾਂ ਦੀ ਤਾਇਨਾਤੀ ਬੀਐਸਐਨਐਲ ਨਾਲ ਸ਼ੁਰੂ ਹੋ ਗਈ ਹੈ। ਚੰਡੀਗੜ੍ਹ ਅਤੇ ਦੇਹਰਾਦੂਨ ਵਿਚਕਾਰ 200 ਸਾਈਟਾਂ ਸਥਾਪਤ ਕੀਤੀਆਂ ਗਈਆਂ ਹਨ ਅਤੇ ਅਗਲੇ ਵੱਧ ਤੋਂ ਵੱਧ ਦੋ ਹਫ਼ਤਿਆਂ ਵਿੱਚ ਲਾਈਵ ਹੋ ਜਾਣਗੀਆਂ।
ਮੀਡੀਆ ਰਿਪੋਰਟਾਂ ਅਨੁਸਾਰ ਇਸ ਮਹੀਨੇ ਦੇ ਅੰਤ ਤੱਕ ਪੰਜਾਬ ਦੇ ਦੋ ਸ਼ਹਿਰਾਂ ਵਿੱਚ 4ਜੀ ਸੇਵਾ ਲਾਈਵ ਕਰ ਦਿੱਤੀ ਜਾਵੇਗੀ। ਇੱਕ ਸੀਨੀਅਰ ਅਧਿਕਾਰੀ ਅਨੁਸਾਰ ਇਹ ਸੇਵਾ ਅੰਮ੍ਰਿਤਸਰ ਅਤੇ ਫਿਰੋਜ਼ਪੁਰ ਵਿੱਚ ਲਾਈਵ ਕੀਤੀ ਜਾਵੇਗੀ। ਇਸ ਦੇ ਨਾਲ ਹੀ ਆਉਣ ਵਾਲੇ 7-10 ਦਿਨਾਂ ‘ਚ ਸਰਵਿਸ ਅਤੇ 4ਜੀ ਸਿਮ ਸ਼ੁਰੂ ਹੋ ਜਾਣਗੇ। ਸੰਚਾਰ ਮੰਤਰੀ ਅਸ਼ਵਿਨੀ ਵੈਸ਼ਨਵ ਨੇ ਹਾਲ ਹੀ ਵਿੱਚ ਕਿਹਾ ਸੀ ਕਿ ਬੀਐਸਐਨਐਲ ਦੇ 4ਜੀ ਨੈਟਵਰਕ ਲਈ ਸਵਦੇਸ਼ੀ ਟੈਲੀਕਾਮ ਸਟੈਕ ਸੈੱਟਅੱਪ ਦੀ ਪਿਛਲੇ ਸਾਲ ਜਾਂਚ ਕੀਤੀ ਗਈ ਸੀ ਅਤੇ ਇੱਕੋ ਸਮੇਂ 10 ਮਿਲੀਅਨ ਕਾਲਾਂ ਦਾ ਸਫਲਤਾਪੂਰਵਕ ਪ੍ਰਬੰਧਨ ਕੀਤਾ ਗਿਆ ਸੀ।
