ਕਿਸਾਨਾਂ ਨੂੰ ਹੁਣ ਐਪ ਰਾਹੀਂ ਮਿਲੇਗੀ ਨਹਿਰੀ ਪਾਣੀ ਦੀ ਪੂਰੀ ਜਾਣਕਾਰੀ

19, ਮਈ : ਫ਼ਾਜ਼ਿਲਕਾ ਐਨਆਈਸੀ ਵੱਲੋਂ ਜਲਸ਼੍ਰੋਤ ਵਿਭਾਗ ਦੇ ਨਾਲ ਤਾਲਮੇਲ ਕਰਕੇ ਨਹਿਰਾਂ ਵਿਚ ਪਾਣੀ ਦੀ ਸਪਲਾਈ ਦੀ ਜਾਣਕਾਰੀ ਕਿਸਾਨਾਂ ਨੂੰ ਦੇਣ ਲਈ ਨਵੀਂ ਮੋਬਾਇਲ ਐਪ  ਬਣਾਈ ਗਈ ਹੈ। ਇਸ ਐਪ  ਨੂੰ ਫ਼ਾਜ਼ਿਲਕਾ ਦੇ ਡਿਪਟੀ ਕਮਿਸ਼ਨਰ ਡਾ: ਸੇਨੂ ਦੁੱਗਲ ਆਈਏਐਸ ਨੇ ਲਾਂਚ ਕੀਤਾ ਹੈ।
ਡਿਪਟੀ ਕਸਿਮ਼ਨਰ ਡਾ: ਸੇਨੂ ਦੁੱਗਲ ਨੇ ਦੱਸਿਆ ਕਿ ਇਸ ਐਪ ਤੇ ਹਰੀਕੇ ਹੈਡਵਰਕਸ ਤੋਂ ਨਿਕਲਣ ਵਾਲੀਆਂ ਸਾਰੀਆਂ ਨਹਿਰਾਂ ਵਿਚ ਪਾਣੀ ਦੀ ਸਪਲਾਈ ਸੰਬੰਧੀ ਤਾਜਾ ਜਾਣਕਾਰੀ ਕਿਸਾਨਾਂ ਨੂੰ ਮਿਲ ਸਕੇਗੀ। ਇਸ ਐਪ ਨੂੰ ਜਲਸ਼੍ਰੋਤ ਵਿਭਾਗ ਵੱਲੋਂ ਲਗਾਤਾਰ ਅਪਡੇਟ ਕੀਤਾ ਜਾਇਆ ਕਰੇਗਾ। ਇਸ ਨਾਲ ਹਰੇਕ ਕਿਸਾਨ ਨੂੰ ਨਹਿਰ ਦੇ ਬੰਦ ਹੋਣ, ਪਾਣੀ ਆਉਣ ਅਤੇ ਜ਼ੇਕਰ ਨਹਿਰ ਚੱਲ ਰਹੀ ਹੈ ਤਾਂ ਉਸ ਵਿਚ ਚੱਲ ਰਹੇ ਪਾਣੀ ਦੀ ਜਾਣਕਾਰੀ ਮਿਲ ਸਕੇਗੀ।
ਇਹ ਐਪ  ਫ਼ਾਜ਼ਿਲਕਾ ਐਨਆਈਸੀ ਦੇ ਡੀਆਈਓ ਪ੍ਰਿੰਸ ਨੇ ਬਣਾਈ ਹੈ। ਇਹ ਐਪ  ਕਿਸਾਨਾਂ ਲਈ ਵਰਦਾਨ ਸਿੱਧ ਹੋਵੇਗੀ। ਉਨ੍ਹਾਂ ਨੇ ਦੱਸਿਆ ਕਿ ਇਹ ਐਪ ਐਡਰਾਇਡ ਤੇ ਆਈਫੋਨ ਦੋਹਾਂ ਮੋਬਾਇਲ ਤੇ ਚੱਲ ਸਕੇਗੀ। ਇਸ ਵਿਚ ਫ਼ਾਜ਼ਿਲਕਾ ਤੋਂ ਇਲਾਵਾ ਫ਼ਿਰੋਜ਼ਪੁਰ, ਸ੍ਰੀ ਮੁਕਤਸਰ ਸਾਹਿਬ, ਫ਼ਰੀਦਕੋਟ ਜ਼ਿਲ੍ਹਿਆਂ ਦੀਆਂ ਨਹਿਰਾਂ ਸੰਬੰਧੀ ਵੀ ਜਾਣਕਾਰੀ ਅਪਡੇਟ ਹੋਵੇਗੀ।
ਇਸ ਐਪ ਦਾ ਨਾਂਅ ਐਫਸੀਸੀ ਰੈਗੁਲੇਸ਼ਨ ਹੈ। ਕੋਈ ਵੀ ਪਲੇਅ ਸਟੋਰ ਤੋਂ ਐਫਸੀਸੀ ਰੈਗੁਲੇਸ਼ਨ ਟਾਇਪ ਕਰਕੇ ਇਹ ਐਪ ਸਰਚ ਕਰਕੇ ਡਾਉਨਲੋਡ ਕਰ ਸਕਦਾ ਹੈ। ਇਸ ਤੋਂ ਬਿਨ੍ਹਾਂ ਇਹ ਸਾਰੀ ਜਾਣਕਾਰੀ ਵਿਭਾਗ ਦੀ ਵੈਬਸਾਇਟ https://fccregulation.punjab.gov.in/ ਤੇ ਵੀ ਵੇਖੀ ਜਾ ਸਕਦੀ ਹੈ। ਜਲ ਸ਼੍ਰੋਤ ਵਿਭਾਗ ਦੇ ਐਸਡੀਓ ਸੁਖਜੀਤ ਸਿੰਘ ਅਨੁਸਾਰ ਇਸ ਐਪ ਨਾਲ ਕਿਸਾਨਾਂ ਨੂੰ ਬਹੁਤ ਸਹੁਲਤ ਹੋਵੇਗੀ ਅਤੇ ਉਨ੍ਹਾਂ ਨੂੰ ਨਹਿਰਾਂ ਸੰਬੰਧੀ ਹਰ ਪ੍ਰਕਾਰ ਦੀ ਜਾਣਕਾਰੀ ਮਿਲ ਸਕੇਗੀ।
ਇਸ ਮੌਕੇ ਵਧੀਕ ਡਿਪਟੀ ਕਮਿਸ਼ਨਰ ਜਨਰਲ ਡਾ: ਮਨਦੀਪ ਕੌਰ, ਜਲਾਲਾਬਾਦ ਦੇ ਐਸਡੀਐਮ  ਰਵਿੰਦਰ ਸਿੰਘ ਅਰੋੜਾ, ਸਹਾਇਕ ਕਮਿਸ਼ਨਰ ਜਨਰਲ  ਸਾਰੰਗਪ੍ਰੀਤ ਸਿੰਘ, ਡੀਟੀਸੀ  ਮਨੀਸ਼ ਠੁਕਰਾਲ, ਡੀਆਈਓ  ਪ੍ਰਿੰਸ, ਸੇਵਾ ਕੇਂਦਰਾਂ ਦੇ ਜ਼ਿਲ੍ਹਾਂ ਮੈਨੇਜਰ ਗਗਨਦੀਪ ਸਿੰਘ, ਡੀਡੀਐਫ  ਆਸੀਸ਼ ਦੂਬੇ ਆਦਿ ਵੀ ਹਾਜ਼ਰ ਸਨ।