ਬਠਿੰਡਾ, 25 ਮਾਰਚ (ਵੀਰਪਾਲ ਕੌਰ): ਡਿਪਟੀ ਕਮਿਸ਼ਨਰ ਸ਼ੌਕਤ ਅਹਿਮਦ ਪਰੇ ਦੀ ਪ੍ਰਧਾਨਗੀ ਹੇਠ ਹਿੰਦੁਸਤਾਨ ਪੈਟਰੋਲੀਅਮ ਕਾਰਪੋਰੇਸ਼ਨ ਲਿਮਟਿਡ ਵਲੋਂ ਸਿਵਲ ਤੇ ਵੂਮੈਨ ਐਂਡ ਚਿਲਡਰਨ ਹਸਪਤਾਲ ਨੂੰ ਮੈਡੀਕਲ ਸਾਜ਼ੋ-ਸਾਮਾਨ ਸੌਂਪਿਆ ਗਿਆ। ਸਿਵਲ ਹਸਪਤਾਲ ਵਿੱਚ ਡਾਇਲਸਿਸ ਮਸ਼ੀਨ ਤੇ ਔਰਤਾਂ ਅਤੇ ਬੱਚਿਆਂ ਦੇ ਹਸਪਤਾਲ ਵਿੱਚ ਆਟੋਕਲੇਵ ਮਸ਼ੀਨ, ਅਪਰੇਸ਼ਨ ਟੇਬਲ, ਅਪਰੇਸ਼ਨ ਸੀਲਿੰਗ ਲਾਈਟ, ਫੈਟਲ ਡੋਪਲਰ, ਸੈਮੀ-ਆਟੋਮੈਟਿਕ ਐਨਾਲਾਈਜ਼ਰ ਅਤੇ ਸੈਂਟਰੀਫਿਊਗਲ ਮਸ਼ੀਨ ਵਰਗੇ ਲੋੜੀਂਦੇ ਉਪਕਰਨ ਉਪਲਬਧ ਕਰਵਾਏ ਗਏ ਹਨ। ਐਚ.ਪੀ.ਸੀ.ਐਲ ਵੱਲੋਂ 22.28 ਲੱਖ ਰੁਪਏ ਦਾ ਸਾਮਾਨ ਦਿੱਤਾ ਗਿਆ ਹੈ। ਇਸ ਮੌਕੇ ਜ਼ਿਲ੍ਹਾ ਸਿਹਤ ਵਿਭਾਗ ਦੀ ਤਰਫੋਂ ਸਿਵਲ ਸਰਜਨ ਤੇਜਵੰਤ ਸਿੰਘ ਢਿੱਲੋਂ, ਸੀਨੀਅਰ ਮੈਡੀਕਲ ਅਫ਼ਸਰ ਡਾ. ਸਤੀਸ਼ ਜਿੰਦਲ, ਸੀਨੀਅਰ ਮੈਡੀਕਲ ਅਫ਼ਸਰ ਡਾ. ਮਨਿੰਦਰ ਪਾਲ, ਨਰਸਿੰਗ ਸਟਾਫ਼ ਅਤੇ ਪੈਰਾ ਮੈਡੀਕਲ ਸਟਾਫ਼ ਵੀ ਹਾਜ਼ਰ ਸੀ।
ਐਚ.ਪੀ.ਸੀ.ਐਲ ਦੇ ਚੀਫ਼ ਸਟੇਸ਼ਨ ਮੈਨੇਜਰ ਸ੍ਰੀ ਅਜੇਪਾਲ ਸਰੋਹਾ ਨੇ ਦੱਸਿਆ ਕਿ ਇਹ ਮੈਡੀਕਲ ਉਪਕਰਨ ਕਾਰਪੋਰੇਟ ਸਮਾਜਿਕ ਜ਼ਿੰਮੇਵਾਰੀ ਨੀਤੀ ਤਹਿਤ ਮੁਹੱਈਆ ਕਰਵਾਇਆ ਗਿਆ ਹੈ। ਐਚ.ਪੀ.ਸੀ.ਐਲ ਪਿੰਡ ਵਾਸੀਆਂ ਦੀਆਂ ਸਿਹਤ ਸੇਵਾਵਾਂ ਵਿੱਚ ਵਾਧਾ ਕਰਨ ਲਈ ਲਗਾਤਾਰ ਤਤਪਰ ਹੈ ਅਤੇ ਨੇੜਲੇ ਪਿੰਡ ਵਾਸੀ ਵੀ ਇਨ੍ਹਾਂ ਉਪਕਰਨਾਂ ਦਾ ਲਾਭ ਉਠਾ ਸਕਣਗੇ।ਇਸ ਦੌਰਾਨ ਸੀਨੀਅਰ ਮੈਡੀਕਲ ਅਫਸਰ ਡਾ. ਮਨਿੰਦਰ ਪੱਲੇ ਨੇ ਐਚ.ਪੀ.ਸੀ.ਐਲ ਵੱਲੋਂ ਜ਼ਿਲ੍ਹਾ ਵਾਸੀਆਂ ਲਈ ਕੀਤੇ ਜਾ ਰਹੇ ਨਿਰੰਤਰ ਕਾਰਜਾਂ ਦੀ ਸ਼ਲਾਘਾ ਕੀਤੀ। ਉਨ੍ਹਾਂ ਕਿਹਾ ਕਿ ਭਵਿੱਖ ਵਿੱਚ ਵੀ ਇਸੇ ਤਰ੍ਹਾਂ ਮੈਡੀਕਲ ਸੇਵਾਵਾਂ ਮੁਹੱਈਆ ਕਰਵਾਈਆਂ ਜਾਣਗੀਆਂ। ਇਸ ਮੌਕੇ ਸੀਨੀਅਰ ਮੈਨੇਜਰ ਸਿਧਾਰਥ ਕੁਮਾਰ, ਸਿਧਾਰਥ ਦੂਆ, ਆਸ਼ੂਤੋਸ਼ ਅਦਿੱਤਿਆ, ਸਹਾਇਕ ਮੈਨੇਜਰ ਹਰਦੀਪ ਸਿੰਘ ਭੱਟੀ, ਡਿਪਟੀ ਜਨਰਲ ਸੁਖਵੰਤ ਸਿੰਘ ਕਾਹਲੋਂ, ਡਿਪਟੀ ਜਨਰਲ ਮੈਨੇਜਰ ਦੁਰਗਾ ਨਰਾਇਣ ਮੀਨਾ ਅਤੇ ਡਿਪਟੀ ਜਨਰਲ ਮੈਨੇਜਰ ਰਾਜੇਸ਼ ਬਰਿਆਰ ਆਦਿ ਹਾਜ਼ਰ ਸਨ।
