ਦੋਮੂੰਹਾ ਤੀਰ : ਸੁਖਦੇਵ ਸਿੰਘ ਢੀਂਡਸਾ ਪੰਜਾਬ ‘ਚ ਚੋਣ ਨਹੀਂ ਲੜਣਗੇ

ਬਠਿੰਡਾ, 14 ਜਨਵਰੀ (ਬਲਵਿੰਦਰ ਸ਼ਰਮਾ) – ਭਾਜਪਾ ਨਾਲ ਰਲ ਕੇ ਚੋਣ ਲੜ ਰਹੇ ਸ਼੍ਰੋਮਣੀ ਅਕਾਲੀ ਦਲ (ਸੰਯੁਕਤ) ਦੇ ਪ੍ਰਧਾਨ ਸੁਖਦੇਵ ਸਿੰਘ ਢੀਂਡਸਾ ਨੇ ਅੱਜ ਮੀਡੀਆ ਵਿਚ ਬਿਆਨ ਜਾਰੀ ਕੀਤਾ ਕਿ ਉਹ ਪੰਜਾਬ ਵਿਧਾਨ ਸਭਾ ਚੋਣਾਂ ‘ਚ ਖੁਦ ਭਾਗ ਨਹੀਂ ਲੈਣਗੇ, ਪਰ ਉਨ੍ਹਾਂ ਦੇ ਸਪੁਤਰ ਪਰਮਿੰਦਰ ਸਿੰਘ ਢੀਂਡਸਾ ਚੋਣ ਲੜ ਰਹੇ ਹਨ। ਸਿਆਸੀ ਗਲਿਆਰਿਆਂ ‘ਚ ਚਰਚਾ ਸ਼ੁਰੂ ਹੋ ਗਈ ਹੈ ਕਿ ਢੀਂਡਸਾ ਨੇ ਦੋਮੂੰਹਾ ਤੀਰ ਛੱਡ ਦਿੱਤਾ ਹੈ, ਜੋ ਨਿਸ਼ਾਨੇ ‘ਤੇ ਹੀ ਲੱਗੇਗਾ। ਜਿਥੇ ਉਹ ਪੁੱਤਰ ਲਈ ਵਿਧਾਨ ਸਭਾ ਦੀ ਟਿਕਟ ਲੈ ਰਹੇ ਹਨ, ਉਥੇ ਆਪਣੀ ਤਿਆਰੀ ਵੀ ਕੇਂਦਰ ਦੀ ਕਰ ਚੁੱਕੇ ਹਨ। ਇੰਝ ਹੋਵੇ ਵੀ ਕਿਉਂ ਨਾ, ਉਹ ਇਸੇ ਕੱਦ ਦੇ ਆਗੂ ਹਨ, ਜਿਨ੍ਹਾਂ ਨੂੰ ਭਾਜਪਾ ਕਦੇ ਵੀ ਜਵਾਬ ਨਹੀਂ ਦੇਵੇਗੀ।
ਇਸੇ ਦੌਰਾਨ ਢੀਂਡਸਾ ਨੇ ਦੱਸਿਆ ਕਿ ਉਨ੍ਹਾਂ ਦੀਆਂ ਮੀਟਿੰਗਾਂ ਭਾਜਪਾ ਹਾਈਕਮਾਨ ਨਾਲ ਜਾਰੀ ਹਨ। ਉਨ੍ਹਾਂ ਦੀ ਪਾਰਟੀ 19 ਤੋਂ 20 ਸੀਟਾਂ ‘ਤੇ ਚੋਣ ਲੜੇਗੀ, ਜਿਨ੍ਹਾਂ ‘ਚੋਂ 12 ਤੋਂ 15 ਸੀਟਾਂ ‘ਤੇ ਜਿੱਤ ਯਕੀਨੀ ਹੈ। ਕਿਉਂਕਿ ਉਹ ਸਿਰਫ ਜਿੱਤ ਸਕਣ ਵਾਲੇ ਉਮੀਦਵਾਰਾਂ ਨੂੰ ਹੀ ਉਮੀਦਵਾਰ ਬਣਾਉਣਗੇ।