ਫਰਿਜ਼ਨੋ (ਕੈਲੀਫੋਰਨੀਆ), 24 ਜੂਨ (ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) – ਫਰਿਜ਼ਨੋ ਦੇ ਯੋਸਮਾਈਟ ਅੰਤਰਰਾਸ਼ਟਰੀ ਹਵਾਈ ਅੱਡੇ ਦੇ ਵਿੱਚ, ਫਰਿਜ਼ਨੋ ਕਾਉਂਟੀ ਡਿਪਾਰਟਮੈਂਟ ਆਫ ਪਬਲਿਕ ਹੈਲਥ ਨੇ ਬੁੱਧਵਾਰ ਨੂੰ ਏਅਰ ਪੋਰਟ ਦੀ ਲਾਬੀ ਵਿੱਚ ਇੱਕ ਟੀਕਾਕਰਨ ਕਲੀਨਿਕ ਖੋਲ੍ਹਿਆ ਹੈ। ਹਵਾਈ ਅੱਡੇ ਵਿੱਚ ਇਸ ਕਲੀਨਿਕ ਦੀ ਸਥਾਪਨਾ ਯਾਤਰੀਆਂ ਦੀ ਗਿਣਤੀ ਵਿੱਚ ਹੋ ਰਹੇ ਵਾਧੇ ਦੇ ਮੱਦੇਨਜ਼ਰ ਸੁਰੱਖਿਆ ਕਾਰਨਾਂ ਕਰਕੇ ਕੀਤੀ ਗਈ ਹੈ। ਏਅਰਪੋਰਟ ਦੇ ਹਵਾਬਾਜ਼ੀ ਡਾਇਰੈਕਟਰ ਕੇਵਿਨ ਮੇਕਲੇ ਅਨੁਸਾਰ ਏਅਰਪੋਰਟ ‘ਤੇ ਯਾਤਰੀਆਂ ਦੀ ਗਤੀਵਿਧੀ ਦਾ ਪੱਧਰ 30% ਤੱਕ ਵਧ ਗਿਆ ਹੈ।
ਇਸ ਲਈ ਸਿਹਤ ਵਿਭਾਗ ਅਨੁਸਾਰ, ਇਹ ਕਲੀਨਿਕ 25 ਜੁਲਾਈ ਤੱਕ ਦੁਪਹਿਰ 3 ਵਜੇ ਤੋਂ ਰਾਤ ਦੇ 11 ਵਜੇ ਤੱਕ ਏਅਰ ਪੋਰਟ ਦੀ ਲਾਬੀ ਵਿੱਚ ਚੱਲੇਗਾ। ਸਿਹਤ ਵਿਭਾਗ ਦੇ ਇੱਕ ਡਾਕਟਰ, ਤ੍ਰਿਨੀਦਾਦ ਸੋਲਿਸ ਨੇ ਕਿਹਾ ਕਿ ਉਹ ਵਾਇਰਸ ਦੇ ਡੈਲਟਾ ਵੇਰੀਐਂਟ ਦੇ ਕਾਰਨ ਟੀਕਾਕਰਨ ਦੀਆਂ ਦਰਾਂ ਵਿੱਚ ਵਾਧਾ ਵੇਖਣਾ ਚਾਹੁੰਦੇ ਹਨ। ਜਿਸ ਵਿੱਚ ਇਸ ਕਲੀਨਿਕ ਦੁਆਰਾ ਸਹਾਇਤਾ ਕੀਤੀ ਜਾਵੇਗੀ। ਫਰਿਜ਼ਨੋ ਕਾਉਂਟੀ ਦੇ ਵਾਇਰਸ ਸਬੰਧੀ ਅੰਕੜਿਆਂ ਅਨੁਸਾਰ, ਕਾਉਂਟੀ ਵਿੱਚ 12 ਸਾਲ ਅਤੇ ਵੱਧ ਉਮਰ ਦੇ 52% ਲੋਕਾਂ ਨੂੰ ਟੀਕੇ ਦੀ ਘੱਟੋ ਘੱਟ ਇੱਕ ਖੁਰਾਕ ਮਿਲੀ ਹੈ। ਸੋਲਿਸ ਨੇ ਦੱਸਿਆ ਕਿ ਵਿਦੇਸ਼ਾਂ ਜਿਵੇਂ ਕਿ ਮੈਕਸੀਕੋ ਆਦਿ ਤੋਂ ਆਉਣ ਵਾਲੇ ਯਾਤਰੀ ਵੀ ਹਵਾਈ ਅੱਡੇ ‘ਤੇ ਟੀਕਾ ਲਗਵਾਉਣ ਦੇ ਯੋਗ ਹੋਣਗੇ।