ਪੈਟਰੋਲ ਬੰਬ ਨਾਲ ਹਮਲਾ ਕਰਨ ਦੇ ਦੋਸ਼ ਵਿੱਚ ਐਂਬੂਲੈਂਸ ਕਰਮਚਾਰੀ ਗ੍ਰਿਫਤਾਰ

ਫਰਿਜ਼ਨੋ (ਕੈਲੀਫੋਰਨੀਆ), 1 ਮਾਰਚ (ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) – ਅਮਰੀਕਾ ਦੇ ਸੂਬੇ ਕਨੈਕਟੀਕਟ ਵਿੱਚ ਪੁਲਿਸ ਦੁਆਰਾ ਐਂਬੂਲੈਂਸ ਕੰਪਨੀ ਦੇ ਕਰਮਚਾਰੀ ਨੂੰ ਪੈਟਰੋਲ ਬੰਬਾਂ ਦੁਆਰਾ ਹਮਲਾ ਕਰਨ ਦੇ ਦੋਸ਼ ਵਿੱਚ ਗ੍ਰਿਫਤਾਰ ਕੀਤਾ ਗਿਆ ਹੈ।
ਰਿਚਰਡ ਵ੍ਹਾਈਟ ਨਾਮ ਦੇ ਇਸ ਵਿਅਕਤੀ ਨੇ ਆਪਣੇ ਹਮਲਿਆਂ ਵਿੱਚ ਦੋ ਐਮਰਜੈਂਸੀ ਮੈਡੀਕਲ ਸੇਵਾਵਾਂ ਏਜੰਸੀਆਂ, ਇੱਕ ਵਾਲੰਟੀਅਰ ਫਾਇਰ ਵਿਭਾਗ ਅਤੇ ਇੱਕ ਨਿਜੀ ਨਿਵਾਸ ਨੂੰ ਨਿਸ਼ਾਨਾ ਬਣਾਇਆ ।ਪੁਲਿਸ ਨੇ ਦੱਸਿਆ ਕਿ ਟੋਰਿੰਗਟਨ, ਕਨੈਕਟੀਕਟ ਦੇ 37 ਸਾਲਾ ਰਿਚਰਡ ਵ੍ਹਾਈਟ ਨੂੰ ਸ਼ਨੀਵਾਰ ਰਾਤ 10 ਵਜੇ ਦੇ ਕਰੀਬ ਪੈਨਸਿਲਵੇਨੀਆ ਸਟੇਟ ਪੁਲਿਸ ਦੇ ਮਿਲਟਨ ਦੇ ਨੇੜੇ ਅੰਤਰਰਾਜੀ 80 ‘ਤੇ ਗ੍ਰਿਫਤਾਰ ਕੀਤਾ। ਪੁਲਿਸ ਅਧਿਕਾਰੀ ਮਾਈਕਲ ਏ ਸਪੀਰਾ ਅਨੁਸਾਰ ਰਿਚਰਡ  ਨੂੰ ਤੀਜੀ ਡਿਗਰੀ ਅੱਗ ਲਗਾਉਣ ਦੇ ਦੋਸ਼ ਨਾਲ 150,000 ਡਾਲਰ ਦੇ ਬਾਂਡ ਸਮੇਤ ਪੈਨਸਿਲਵੇਨੀਆ ਵਿੱਚ ਰੱਖਿਆ ਗਿਆ ਹੈ।ਪੁਲਿਸ ਅਨੁਸਾਰ ਰਿਚਰਡ ਮੈਰੀਡੇਨ, ਕਨੈਕਟੀਕਟ ਵਿੱਚ ਹੰਟਰਜ਼ ਐਂਬੂਲੈਂਸ ਏਜੰਸੀ ਦਾ ਕਰਮਚਾਰੀ ਹੈ ਅਤੇ ਉਸਦਾ ਸ਼ਨੀਵਾਰ ਨੂੰ ਸਵੇਰੇ 10 ਵਜੇ ਇੱਕ ਹੋਰ ਕਰਮਚਾਰੀ ਨਾਲ ਝਗੜਾ ਹੋਇਆ ਸੀ, ਜਿਸ ਵਿੱਚ ਉਸਨੂੰ ਅਨੁਸ਼ਾਸਨੀ ਸੁਣਵਾਈ ਕਰਕੇ ਪ੍ਰਸ਼ਾਸਕੀ ਛੁੱਟੀ ‘ਤੇ ਰੱਖਿਆ ਗਿਆ ਸੀ। ਇਸ ਦੇ ਬਾਅਦ ਸ਼ਨੀਵਾਰ ਨੂੰ ਸ਼ਾਮ ਚਾਰ ਵਜੇ ਦੇ ਬਾਅਦ ਵ੍ਹਾਈਟ ਨੇ ਓਲਡ ਸੇਬਰੂਕ ਦੇ ਹੰਟਰਸ ਐਂਬੂਲੈਂਸ ਸਟੇਸ਼ਨ ਵਿੱਚ ਕਥਿਤ ਤੌਰ ‘ਤੇ ਇੱਕ ਮੁਲਾਜ਼ਮ ਦੇ ਕਮਰੇ ਅੰਦਰ ਪੈਟਰੋਲ ਬੰਬ ਨਾਲ ਹਮਲਾ ਕਰਕੇ ਭੱਜ ਗਿਆ।ਇੰਨਾ ਹੀ ਨਹੀਂ ਇਸਦੇ ਬਾਅਦ ਵੀ ਤਕਰੀਬਨ 5 ਵਜੇ  ਹੰਟਰਜ਼ ਐਂਬੂਲੈਂਸ ਏਜੰਸੀ ਵਿਖੇ ਰਿਚਰਡ ਦੀ ਕਾਰ ਨਾਲ ਮੇਲ ਖਾਂਦੇ ਵਾਹਨ ਨੂੰ ਇੱਕ ਇਮਾਰਤ ‘ਤੇ ਹਮਲਾ ਕਰਦੇ ਵੇਖਿਆ ਗਿਆ। ਇਸ ਮਾਮਲੇ ਵਿੱਚ ਪੁਲਿਸ ਅਨੁਸਾਰ ਕਿਸੇ ਤਰ੍ਹਾਂ ਦਾ ਜਾਨੀ ਨੁਕਸਾਨ ਨਹੀਂ ਹੋਇਆ ਹੈ।