ਅਬੋਹਰ ਸ਼ਹਿਰ ਵਿਚ ਦਿਨ ਸਮੇਂ ਭਾਰੀ ਵਾਹਨਾਂ ਦਾ ਦਾਖਲਾ ਰੋਕਣ ਸਬੰਧੀ ਲੋਕਾਂ ਤੋਂ ਇਤਰਾਜ ਮੰਗੇ

ਫਾਜ਼ਿਲਕਾ, 26 ਫਰਵਰੀ (ਰਿਤਿਸ਼) – ਵਧੀਕ ਜ਼ਿਲਾ ਮੈਜਿਸਟ੍ਰੇਟ ਕਮ ਏ.ਡੀ.ਸੀ. ਜਨਰਲ ਸ੍ਰੀ ਅਭੀਜੀਤ ਕਪਲਿਸ ਨੇ ਸੀਆਰਪੀਸੀ ਦੀ ਧਾਰਾ 134 ਅਧੀਨ ਅਬੋਹਰ ਸ਼ਹਿਰ ਦੀ ਹਦੂਦ ਅੰਦਰ 4 ਮਾਰਚ 2021 ਤੋਂ ਸਵੇਰੇ 9 ਤੋਂ ਰਾਤ 9 ਵਜੇ ਤੱਕ ਭਾਰੀ ਵਾਹਨ ਜਿਵੇਂ ਟਰੈਕਟਰ ਟਰਾਲੀਆਂ, ਟੱਰਕ ਅਤੇ ਟ੍ਰੇਲਰ, ਪੀਟਰ ਰੇਹੜੇ ਵਰਗੇ ਸਥਾਨਕ ਤੌਰ ਤੇ ਤਿਆਰ ਕੀਤੇ ਵਪਾਰਕ ਵਾਹਨਾਂ ਨੂੰ ਚਲਾਉਣ ਤੇ ਰੋਕ ਲਗਾਉਣ ਦਾ ਪ੍ਰਸਤਾਵ ਦਿੱਤਾ ਹੈ। ਪ੍ਰਸਤਾਵ ਅਨੁਸਾਰ ਅਜਿਹੇ ਵਪਾਰਕ ਅਤੇ ਭਾਰੀ ਵਾਹਨ ਕੇਵਲ ਰਾਤ ਸਮੇਂ ਹੀ ਰਾਤ 9 ਵਜੇ ਤੋਂ ਸਵੇਰੇ 9 ਵਜੇ ਤੱਕ ਸ਼ਹਿਰ ਅੰਦਰ ਆ ਸਕਣਗੇ। ਇਸ ਸਬੰਧੀ ਜੇਕਰ ਕਿਸੇ ਨੂੰ ਕੋਈ ਇਤਰਾਜ ਹੋਵੇ ਤਾਂ ਉਹ ਆਪਣੇ ਇਤਰਾਜ ਗੁਰਮੀਤ ਸਿੰਘ, ਸਬ ਇੰਸਪੈਕਟਰ, ਟੈ੍ਰਫਿਕ ਜਾਂ ਡੀਐਸਪੀ ਅਬੋਹਰ ਦੇ ਦਫ਼ਤਰ ਵਿਖੇ ਜਮਾਂ ਕਰਵਾ ਸਕਦਾ ਹੈ। ਇੰਨਾਂ ਇਤਰਾਜਾਂ ਸਬੰਧੀ ਜਨਤਕ ਸੁਣਵਾਈ 2 ਮਾਰਚ 2021 ਨੂੰ ਸਵੇਰੇ 11 ਵਜੇ ਨਗਰ ਨਿਗਮ ਅਬੋਹਰ ਦੇ ਟਾਊਨ ਹਾਲ ਵਿਖੇ ਹੋਵੇਗੀ।