ਨਿਊਯਾਰਕ ਵਿੱਚ ਸਬਵੇਅ ਸਟੇਸ਼ਨਾਂ ‘ਤੇ ਗਸ਼ਤ ਕਰਨ ਲਈ ਹੋਵੇਗੀ 600 ਤੋਂ ਵੱਧ ਅਧਿਕਾਰੀਆਂ ਦੀ ਤਾਇਨਾਤੀ

ਫਰਿਜ਼ਨੋ (ਕੈਲੀਫੋਰਨੀਆ), 19 ਫਰਵਰੀ (ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) – ਨਿਊਯਾਰਕ ਦੇ ਸਬਵੇਅ ਸਟੇਸ਼ਨਾਂ ‘ਤੇ ਪਿਛਲੇ ਦਿਨੀ ਹੋਈਆਂ ਛੁਰੇਮਾਰੀ ਦੀਆਂ ਘਟਨਾਵਾਂ ਤੋਂ ਬਾਅਦ ਯਾਤਰੀਆਂ ਅਤੇ ਬੇਘਰੇ ਲੋਕਾਂ ਨੂੰ ਵਧੇਰੇ ਸੁਰੱਖਿਆ ਪ੍ਰਦਾਨ ਕਰਨ ਦੇ ਨਾਲ ਨਿਊਯਾਰਕ ਪੁਲਿਸ ਵਿਭਾਗ ਵੱਲੋਂ 600 ਤੋਂ ਵੱਧ ਵਰਦੀਧਾਰੀ ਪੁਲਿਸ ਅਧਿਕਾਰੀਆਂ ਨੂੰ ਸਬਵੇਅ ਸਿਸਟਮ ਤੇ ਗਸ਼ਤ ਲਈ ਤਾਇਨਾਤ ਕੀਤਾ ਜਾਵੇਗਾ। ਨਿਊਯਾਰਕ ਵਿੱਚ ਪਿਛਲੇ ਦਿਨੀ ਛੁਰੇਮਾਰੀ ਦੇ ਹਮਲੇ ਵਿੱਚ ਦੋ ਵਿਅਕਤੀਆਂ ਦੀ ਮੌਤ ਹੋਣ ਦੇ ਨਾਲ  ਚਾਰ ਹੋਰ ਜ਼ਖਮੀ ਹੋ ਗਏ ਸਨ ਅਤੇ ਸਾਰੇ ਪੀੜਤ ਬੇਘਰ ਲੋਕ ਮੰਨੇ ਗਏ ਹਨ।ਜਦਕਿ ਪਿਛਲੇ ਕੁਝ ਮਹੀਨਿਆਂ ਦੌਰਾਨ ਹੋਰ ਹਿੰਸਕ ਘਟਨਾਵਾਂ ਵੀ ਸਾਹਮਣੇ ਆਈਆਂ ਹਨ।ਇਸ ਮਾਮਲੇ ਵਿੱਚ  ਟਰਾਂਜ਼ਿਟ ਚੀਫ ਕੈਥਲੀਨ ਓ ਰੀਲੀ ਨੇ ਜਾਣਕਾਰੀ ਦਿੱਤੀ ਕਿ ਸੁਰੱਖਿਆ ਦੇ ਮੰਤਵ ਨਾਲ 644 ਅਧਿਕਾਰੀ ਪਲੇਟਫਾਰਮ ‘ਤੇ ਗਸ਼ਤ , ਰੇਲ ਗੱਡੀਆਂ ਦਾ ਮੁਆਇਨਾ , ਪ੍ਰਵੇਸ਼ ਦੁਆਰਾਂ ਦੀ ਸੁਰੱਖਿਆ ਆਦਿ ਦੇ ਕੰਮ ਕਰਨਗੇ। ਇਹਨਾਂ ਗਸ਼ਤ ਅਫਸਰਾਂ ਦੇ ਨਵੇਂ ਸਮੂਹ ਵਿੱਚ 331 ਟਰਾਂਜ਼ਿਟ ਬਿਊਰੋ ਅਧਿਕਾਰੀ ਅਤੇ 313 ਪੈਟਰੋਲ ਬਿਊਰੋ ਪੁਲਿਸ ਅਧਿਕਾਰੀ ਸ਼ਾਮਿਲ ਹੋਣਗੇ। ਇਸਦੇ ਇਲਾਵਾ ਕਈ ਲੋਕ ਬੇਘਰ ਲੋਕਾਂ ਲਈ ਇਸ ਕਦਮ ਦੀ ਜਗ੍ਹਾ ਉਹਨਾਂ ਲਈ ਪਨਾਹ ਘਰ ਬਣਾਉਣ ਲਈ ਜੋਰ ਦੇ ਰਹੇ ਹਨ।ਮੈਟਰੋਪੋਲੀਟਨ ਟ੍ਰਾਂਸਪੋਰਟੇਸ਼ਨ ਅਥਾਰਟੀ (ਐਮ ਟੀ ਏ) ਨੇ ਮਹਾਂਮਾਰੀ ਦੇ ਦੌਰਾਨ  ਸਬਵੇਅ ਨੂੰ ਬੰਦ ਕਰ ਦਿੱਤਾ ਸੀ ਤੇ ਇਸ ਦੌਰਾਨ ਬੇਘਰੇ ਲੋਕਾਂ ਨੂੰ ਸਬਵੇਅ ਸਟੇਸ਼ਨਾਂ ਤੋਂ ਬਾਹਰ ਕੱਢਿਆ ਗਿਆ ਸੀ ਜੋ ਕਿ ਸਰਦੀਆਂ ਦੇ ਮਹੀਨਿਆਂ ਵਿੱਚ ਅਕਸਰ ਨਿੱਘ ਪ੍ਰਾਪਤ ਕਰਨ ਲਈ ਸਬਵੇਅ ਸਟੇਸ਼ਨਾਂ ਤੇ ਜਾਂਦੇ ਹਨ।