ਇੰਡੀਆਨਾਪੋਲਿਸ ‘ਚ ਪਾਲਤੂ ਜਾਨਵਰਾਂ ਦੀ ਦੁਕਾਨ ‘ਤੇ ਅੱਗ ਲੱਗਣ ਨਾਲ 100 ਦੇ ਕਰੀਬ ਜਾਨਵਰਾਂ ਦੀ ਹੋਈ ਮੌਤ

ਫਰਿਜ਼ਨੋ (ਕੈਲੀਫੋਰਨੀਆ), 17 ਫਰਵਰੀ (ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) – ਅਮਰੀਕਾ ਦੇ ਇੰਡੀਆਨਾਪੋਲਿਸ ਵਿੱਚ ਇੱਕ ਪਾਲਤੂ ਜਾਨਵਰਾਂ ਦੀ ਦੁਕਾਨ ‘ਚ ਲੱਗੀ ਅੱਗ ਦੀ ਲਪੇਟ ਵਿੱਚ ਆ ਜਾਣ ਕਾਰਨ ਕਈ ਜਾਨਵਰਾਂ ਦੀ ਮੌਤ ਹੋ ਜਾਣ ਦੀ ਮੰਦਭਾਗੀ ਘਟਨਾ ਵਾਪਰੀ ਹੈ। ਸ਼ਹਿਰ ਦੇ ਫਾਇਰ ਡਿਪਾਰਟਮੈਂਟ ਨੇ ਦੱਸਿਆ ਕਿ ਸੋਮਵਾਰ ਦੀ ਰਾਤ ਨੂੰ ਲੱਗੀ ਅੱਗ ਦੌਰਾਨ ਪੈਦਾ ਹੋਏ ਧੂੰਏਂ ਦੇ ਕਾਰਨ  ਲੱਗਭਗ 100 ਜਾਨਵਰਾਂ ਦੀ ਮੌਤ ਹੋਈ ਹੈ। ਅੱਗ ਬੁਝਾਊ ਵਿਭਾਗ ਦੇ ਅਧਿਕਾਰੀਆਂ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ “ਅੰਕਲ ਬਿਲਸ ਪੈੱਟ ਸੈਂਟਰ” ਵਿੱਚ ਮਰਨ ਵਾਲੇ ਪਾਲਤੂ ਜਾਨਵਰਾਂ ‘ਚ  ਵਿੱਚ 40 ਦੇ ਕਰੀਬ ਕੁੱਤੇ ਅਤੇ 25 ਤੋਤੇ , ਖਰਗੋਸ਼ ਅਤੇ ਹੋਰ ਜਾਨਵਰ ਵੀ ਸ਼ਾਮਿਲ ਸਨ। ਇਸਦੇ ਇਲਾਵਾ ਇਸ ਅੱਗ ਦੀ ਘਟਨਾ ਵਿੱਚ ਕੁੱਝ ਜਾਨਵਰ ਜੀਵਤ ਵੀ ਬਚੇ ਹਨ। ਇਸ ਅੱਗ ਸੰਬੰਧੀ ਅਧਿਕਾਰੀਆਂ ਨੇ ਦੱਸਿਆ ਕਿ ਕਰਮਚਾਰੀਆਂ ਦੁਆਰਾ ਕਾਰਵਾਈ ਕਰਦਿਆਂ ਪਾਲਤੂ ਜਾਨਵਰਾਂ ਦੀ ਦੁਕਾਨ ਨੂੰ ਅੱਗ ਲੱਗਣ ਕਾਰਨ ਪੈਦਾ ਹੋਏ ਸੰਘਣੇ ਅਤੇ ਕਾਲੇ ਧੂੰਏਂ ਨਾਲ ਭਰੀ ਹੋਈ ਪਾਇਆ ਗਿਆ। ਅਧਿਕਾਰੀਆਂ ਦੇ ਉੱਥੇ ਪਹੁੰਚਣ ਸਮੇਂ ਵੀ ਜਾਨਵਰ ਉਨ੍ਹਾਂ ਦੇ ਪਿੰਜਰਿਆਂ  ਵਿੱਚ ਸਨ ਅਤੇ ਧੂੰਏਂ ਨਾਲ ਪੈਦਾ ਹੋਈਆਂ ਘਾਤਕ ਗੈਸਾਂ ਨਾਲ ਦਮ ਤੋੜ ਗਏ ਸਨ।ਜਾਨਵਰਾਂ ਦੀ ਦੁਕਾਨ ਵਿੱਚ ਲੱਗੀ ਅੱਗ ਨੂੰ ਅਮਲੇ ਦੁਆਰਾ ਇੱਕ ਘੰਟੇ  ਕਾਬੂ ਕੀਤਾ ਗਿਆ, ਜਦਕਿ ਅੱਗ ਲੱਗਣ ਦੇ ਕਾਰਨਾਂ ਦੀ ਫਿਲਹਾਲ ਜਾਂਚ ਕੀਤੀ ਜਾ ਰਹੀ ਹੈ।