ਫਰਿਜ਼ਨੋ (ਕੈਲੀਫੋਰਨੀਆ), 10 ਫਰਵਰੀ (ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) – ਅਮਰੀਕਾ ਦੇ ਫਲੋਰਿਡਾ ਸਥਿਤ ਪਿਨੇਲਸ ਕਾਉਂਟੀ ਵਿੱਚ ਇੱਕ ਕੰਪਿਊਟਰ ਹੈਕਰ ਵੱਲੋਂ ਪਾਣੀ ਦੀ ਸਪਲਾਈ ਨੂੰ ਜ਼ਹਿਰੀਲਾ ਕਰਨ ਦਾ ਹੈਰਾਨੀਜਨਕ ਮਾਮਲਾ ਸਾਹਮਣੇ ਆਇਆ ਹੈ। ਇਸ ਮਾਮਲੇ ਦੀ ਜਾਂਚ ਕਰ ਰਹੇ ਅਧਿਕਾਰੀਆਂ ਅਨੁਸਾਰ ਓਲਡਸਮਾਰ ਦੇ ਟਾਂਪਾ ਬੇਅ ਵਿੱਚ ਸ਼ੁੱਕਰਵਾਰ ਦੀ ਸਵੇਰ ਇੱਕ ਵਾਟਰ ਪਲਾਂਟ ਦੀ ਨਿਗਰਾਨੀ ਕਰ ਰਹੇ ਪਲਾਂਟ ਆਪਰੇਟਰ ਨੇ ਸਪਲਾਈ ਪ੍ਰਣਾਲੀ ਵਿੱਚ ਕੁੱਝ ਅਸਮਾਨਤਾਵਾਂ ਵੇਖੀਆਂ ,ਜਿਸਦੇ ਤਹਿਤ ਕੋਈ ਹੈਕਰ ਕੰਪਿਊਟਰ ਪ੍ਰਣਾਲੀ ਨੂੰ ਨਿਯੰਤਰਿਤ ਕਰਨ ਦੇ ਨਾਲ ਸਕ੍ਰੀਨ ਤੇ ਵੱਖ ਵੱਖ ਕਾਰਜਾਂ ਨੂੰ ਖੋਲ੍ਹ ਰਿਹਾ ਸੀ ਅਤੇ ਪਾਣੀ ਦੀ ਸਪਲਾਈ ਵਿਚ ਸੋਡੀਅਮ ਹਾਈਡ੍ਰੋਕਸਾਈਡ ਨੂੰ ਪ੍ਰਤੀ ਮਿਲੀਅਨ ਦੇ 100 ਵੇ ਹਿੱਸੇ ਤੋਂ ਵਧਾ ਕੇ 11,100 ਵੇ ਹਿੱਸੇ ਪ੍ਰਤੀ ਮਿਲੀਅਨ ਵਿੱਚ ਬਦਲ ਰਿਹਾ ਸੀ। ਇਸ ਸੰਬੰਧੀ ਪਿਨੇਲਸ ਕਾਉਂਟੀ ਸ਼ੈਰਿਫ ਬੌਬ ਗੋਲਟੀਐਰੀ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਸੋਡੀਅਮ ਹਾਈਡ੍ਰੋਕਸਾਈਡ, ਜਿਸ ਨੂੰ ਲਾਇ ਵੀ ਕਿਹਾ ਜਾਂਦਾ ਹੈ ਜੋ ਕਿ ਨਿਕਾਸੀ ਪ੍ਰਣਾਲੀ ਸਾਫ਼ ਕਰਨ ਲਈ ਵਰਤਿਆ ਜਾਣ ਵਾਲਾ ਇੱਕ ਮੁੱਖ ਪਦਾਰਥ ਹੈ ਅਤੇ ਇਸਦੀ ਮਾਤਰਾ ਵਿੱਚ ਵਾਧਾ ਹੋਣਾ ਖਤਰਨਾਕ ਹੈ। ਬਿਮਾਰੀ ਕੰਟਰੋਲ ਕੇਂਦਰ(ਸੀ.ਡੀ.ਸੀ)ਅਨੁਸਾਰ, ਸੋਡੀਅਮ ਹਾਈਡ੍ਰੋਕਸਾਈਡ ਦੀ ਵਧੇਰੇ ਮਾਤਰਾ ਉਲਟੀਆਂ, ਛਾਤੀ ਅਤੇ ਪੇਟ ਵਿੱਚ ਦਰਦ ਆਦਿ ਦਾ ਕਾਰਨ ਬਣ ਸਕਦੀ ਹੈ। ਪਰ ਖੁਸ਼ਕਿਸਮਤੀ ਨਾਲ, ਵਾਟਰ ਟ੍ਰੀਟਮੈਂਟ ਪਲਾਂਟ ਦੇ ਅੰਦਰ ਪਲਾਂਟ ਆਪਰੇਟਰ ਨੇ ਇਸ ਤਰਲ ਦੀ ਮਾਤਰਾ ਵਿੱਚ ਹੋ ਰਹੇ ਵਾਧੇ ਦੇ ਪੱਧਰ ਨੂੰ ਤੁਰੰਤ ਘਟਾ ਦਿੱਤਾ । ਇਸਦੇ ਬਾਅਦ ਸੀਕ੍ਰੇਟ ਸਰਵਿਸਾਂ ਅਤੇ ਐਫ ਬੀ ਆਈ ਸਾਈਬਰ ਏਜੰਸੀਆਂ ਇਸ ਕੰਮ ਨੂੰ ਕਰਨ ਵਾਲੇ ਹੈਕਰ ਦੀ ਭਾਲ ਕਰ ਰਹੀਆਂ ਹਨ। ਇਹ ਘਟਨਾ ਰੇਮੰਡ ਜੇਮਜ਼ ਸਟੇਡੀਅਮ ਤੋਂ ਲੱਗਭਗ 30 ਮੀਲ ਦੂਰ ਸੁਪਰ ਬਾਲ ਈਵੈਂਟ ਤੋਂ ਦੋ ਦਿਨ ਪਹਿਲਾਂ ਵਾਪਰੀ ਸੀ।