ਫਰਿਜ਼ਨੋ (ਕੈਲੀਫੋਰਨੀਆ), 2 ਫਰਵਰੀ (ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) – ਕੋਰੋਨਾਂ ਵਾਇਰਸ ਮਹਾਂਮਾਰੀ ਦੀ ਲਾਗ ਨੂੰ ਫੈਲਣ ਤੋਂ ਰੋਕਣ ਲਈ ਇਸ ਦਾ ਟੈਸਟ ਕਰਵਾਉਣਾ ਬਹੁਤ ਜਰੂਰੀ ਹੈ। ਟੈਸਟ ਦੇ ਨਤੀਜੇ ਨੂੰ ਧਿਆਨ ਵਿੱਚ ਰਖਦਿਆਂ ਹੋਇਆ ਇਸ ਵਾਇਰਸ ਨੂੰ ਫੈਲਣ ਤੋਂ ਰੋਕਿਆ ਜਾ ਸਕਦਾ ਹੈ । ਇਸ ਲਈ ਅਮਰੀਕਾ ਵਿੱਚ ਇਸ ਪ੍ਰਕਿਰਿਆ ਨੂੰ ਹੋਰ ਤੇਜ਼ ਅਤੇ ਸਰਲ ਬਨਾਉਣ ਲਈ ਕੋਰੋਨਾ ਟੈਸਟ ਕਿੱਟਾਂ ਨੂੰ ਵੈਂਡਿੰਗ ਮਸ਼ੀਨਾਂ ਰਾਹੀ ਮੁਹੱਈਆ ਕਰਵਾਉਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ। ਅਮਰੀਕੀ ਲੋਕ ਜਲਦੀ ਹੀ ਦੇਸ਼ ਭਰ ਦੇ ਕਰਿਆਨਾ ਸਟੋਰ, ਸ਼ਾਪਿੰਗ ਮਾਲ, ਹਵਾਈ ਅੱਡਿਆਂ ਅਤੇ ਸਬਵੇਅ ਸਟੇਸ਼ਨਾਂ ਆਦਿ ‘ਤੇ ਇੱਕ ਨਵੀਂ ਵੈਂਡਿੰਗ ਮਸ਼ੀਨ ਨੂੰ ਵੇਖਣਗੇ। ਇਹਨਾਂ ਵੈਂਡਿੰਗ ਮਸ਼ੀਨਾਂ ਦੁਆਰਾ ਸੰਪਰਕ ਰਹਿਤ ਕੋਰੋਨਾ ਟੈਸਟਿੰਗ ਕਿੱਟਾਂ ਦੀ ਪੇਸ਼ਕਸ਼ ਕਰਨ ਲਈ ਸਟਾਰਟਅਪ ਵੈਲਨੈਸ ਫਾਰ ਹਿਊਮੈਨਟੀ ਨੇ ਮੈਡੀਕਲ ਡਿਵਾਈਸ ਕੰਪਨੀ ਸਪੈਕਟ੍ਰਮ ਸਲਿਊਸ਼ਨਜ਼ ਤੇ ਸੌਫਟਵੇਅਰ ਅਤੇ ਟੈਕਨੋਲੋਜੀ ਸਰਵਿਸਿਜ਼ ਕੰਪਨੀ ਸਵਾਈਫਟ ਨਾਲ ਸਾਂਝੇਦਾਰੀ ਕੀਤੀ ਹੈ ।ਇਸ ਮਸ਼ੀਨ ਰਾਹੀ ਫੂਡ ਐਂਡ ਡਰੱਗ ਐਡਮਿਨਿਸਟ੍ਰੇਸ਼ਨ (ਐਫ ਡੀ ਏ) ਦੁਆਰਾ ਅਧਿਕਾਰਤ ਕੋਵਿਡ -19 ਲਈ ਥੁੱਕ ਟੈਸਟ ਦੀ ਟੈਸਟ ਕਿੱਟ ਪ੍ਰਦਾਨ ਕੀਤੀ ਜਾਵੇਗੀ। ਇਸ ਕੰਪਨੀ ਨੇ ਹਾਲ ਹੀ ਵਿੱਚ ਨਿਊਯਾਰਕ ‘ਚ ਪਹਿਲੀ ਵੈਂਡਿੰਗ ਮਸ਼ੀਨ ਦਾ ਉਦਘਾਟਨ ਕੀਤਾ ਹੈ ਅਤੇ ਅਗਲੇ ਛੇ ਮਹੀਨਿਆਂ ਵਿੱਚ ਦੇਸ਼ ਭਰ ਵਿੱਚ ਹਜ਼ਾਰਾਂ ਮਸ਼ੀਨਾਂ ਨੂੰ ਲਗਾਉਣ ਦੀ ਯੋਜਨਾ ਹੈ। ਕੰਪਨੀ ਅਨੁਸਾਰ ਮੌਜੂਦਾ ਸਮੇਂ ਕੋਰੋਨਾ ਵਾਇਰਸ ਟੈਸਟਿੰਗ ਲਈ ਜ਼ਿਆਦਾ ਸਮਾਂ ਉਡੀਕ ਕਰਨੀ ਪੈਂਦੀ ਹੈ ਖ਼ਾਸਕਰ ਨਿਊਯਾਰਕ ਵਰਗੇ ਪ੍ਰਮੁੱਖ ਸ਼ਹਿਰਾਂ ਵਿੱਚ ਲੰਮੀਆਂ ਲਾਈਨਾਂ ਵੀ ਲੱਗ ਜਾਂਦੀਆਂ ਹਨ।ਇਸ ਲਈ ਇਹਨਾਂ ਵੈਂਡਿੰਗ ਮਸ਼ੀਨਾਂ ਨਾਲ ਵਾਇਰਸ ਸੰਬੰਧੀ ਟੈਸਟ ਨੂੰ ਤੇਜ਼ ਅਤੇ ਸਰਲ ਬਨਾਉਣ ਵਿੱਚ ਮੱਦਦ ਮਿਲੇਗੀ ਅਤੇ ਇਹਨਾਂ ਟੈਸਟ ਕਿੱਟਾਂ ਦੀ ਕੀਮਤ 119 ਤੋਂ 149 ਡਾਲਰ ਤੱਕ ਹੋ ਸਕਦੀ ਹੈ।ਇਸਦੇ ਇਲਾਵਾ ਇਹਨਾਂ ਟੈਸਟ ਕਿੱਟਾਂ ਵਿੱਚ ਇੱਕ ਥੁੱਕ ਇਕੱਠਾ ਕਰਨ ਵਾਲਾ ਉਪਕਰਣ, ਬਾਇਓਹਾਜ਼ਰਡ ਬੈਗ, ਰਿਟਰਨ ਸ਼ਿਪਿੰਗ ਲੇਬਲ ਅਤੇ ਉਪਭੋਗਤਾ ਗਾਈਡ ਆਦਿ ਸ਼ਾਮਿਲ ਹਨ। ਇਹ ਟੈਸਟ ਕਿੱਟਾਂ ਸਿਹਤ ਯੋਜਨਾ ਦੇ ਅਧਾਰ ਤੇ ਬੀਮੇ ਦੁਆਰਾ ਕਵਰ ਕੀਤੀਆਂ ਜਾ ਸਕਦੀਆਂ ਹਨ ਅਤੇ ਵੈਲਨੈਸ ਫਾਰ ਹਿਊਮੈਨਟੀ ਅਤੇ ਐਮਾਜ਼ਾਨ.ਕਾਮ ਦੁਆਰਾ ਘਰ ਦੀ ਡਿਲੀਵਰੀ ਲਈ ਵੀ ਉਪਲੱਬਧ ਹਨ।