ਅਮਰੀਕਾ ਦੇ ਫਲੋਰੀਡਾ ਰਾਜ ਵਿੱਚ ਦੋ ਐਫ.ਬੀ.ਆਈ. ਏਜੰਟਾਂ ਦੀ ਮੌਤ ‘ਤੇ ਤਿੰਨ ਜਖਮੀ

ਫਰਿਜ਼ਨੋ (ਕੈਲੀਫੋਰਨੀਆਂ) 2 ਫ਼ਰਵਰੀ (ਗੁਰਿੰਦਰਜੀਤ ਨੀਟਾ ਮਾਛੀਕੇ – ਕੁਲਵੰਤ ਧਾਲੀਆਂ) – ਮੰਗਲਵਾਰ ਸਵੇਰੇ ਦੱਖਣੀ ਫਲੋਰਿਡਾ ਵਿੱਚ ਵਾਰੰਟ ਸਰਵ ਕਰਦਿਆਂ ਹੋਈ ਗੋਲੀਬਾਰੀ ਵਿੱਚ ਦੋ ਐਫ.ਬੀ.ਆਈ. ਏਜੰਟ ਮਾਰੇ ਗਏ ਅਤੇ ਤਿੰਨ ਜ਼ਖਮੀ ਹੋ ਗਏ। ਇਹ ਘਟਨਾ ਫਲੋਰਿਡਾ ਸਟੇਟ ਦੇ ਸਨਰਾਈਜ਼ ਸ਼ਹਿਰ ਦੀ ਇੱਕ ਅਪਾਰਟਮੈਂਟ ਬਿਲਡਿੰਗ ਵਿੇਚ ਵਾਪਰੀ।
ਅਧਿਕਾਰੀਆ ਮੁਤਾਬਕ ਏਜੰਟ ਕਾਨੂੰਨ-ਲਾਗੂ ਕਰਨ ਵਾਲੀ ਟੀਮ ਦਾ ਇੱਕ ਹਿੱਸਾ ਸਨ ਜੋ ਸਨਰਾਈਜ਼ ਸ਼ਹਿਰ ਵਿੱਚ ਬੱਚਿਆਂ ਵਿਰੁੱਧ ਹਿੰਸਕ ਜੁਰਮਾਂ ਦੇ ਸਬੰਧ ਵਿੱਚ ਅਪ੍ਰੇਸ਼ਨ ਚਲਾਉਂਦੇ ਹਨ।
ਫੈਡਰਲ ਬਿਉਰੋ ਆਫ ਇਨਵੈਸਟੀਗੇਸ਼ਨ ਨੇ ਕਿਹਾ ਕਿ ਜ਼ਖਮੀ ਏਜੰਟਾਂ ਨੂੰ ਹਸਪਤਾਲ ਲਿਜਾਇਆ ਗਿਆ ਅਤੇ ਉਨ੍ਹਾਂ ਦੀ ਹਾਲਤ ਸਥਿਰ ਹੈ।
ਸਨਰਾਈਜ਼ ਸਿਟੀ ਦੇ ਇਕ ਬੁਲਾਰੇ ਨੇ ਦੱਸਿਆ ਕਿ ਏਜੰਟ ਇਕ ਅਪਾਰਟਮੈਂਟ ਕੰਪਲੈਕਸ ਵਿਚ ਸਵੇਰੇ 6 ਵਜੇ ਤੋਂ ਬਾਅਦ ਵਾਰੰਟ ਸਰਵ ਕਰਨ ਲਈ ਪਹੁੰਚੇ ਸਨ ਤਾਂ ਸ਼ੱਕੀ ਵਿਅਕਤੀ ਨੇ ਗੋਲੀ ਚਲਾ ਦਿੱਤੀ ਜਿਸ ਵਿੱਚ ਦੋ ਏਜੰਟ ਮਾਰੇ ਗਏ ਅਤੇ ਤਿੰਨ ਜਖਮੀ ਹੋ ਗਏ। ਪੁਲਿਸ ਘੇਰੇ ਵਿੱਚ ਆਉਣ ਉਪਰੰਤ ਸ਼ੱਕੀ ਨੇ ਆਪਣੇ ਆਪ ਨੂੰ ਗੋਲੀ ਮਾਰ ਲਈ ਅਤੇ ਉਹ ਵੀ ਮਾਰਿਆ ਗਿਆ।
ਸਨਰਾਈਜ਼ ਪੁਲਿਸ ਵਿਭਾਗ ਦੇ ਅਨੁਸਾਰ ਲਾਅ ਇੰਫੋਰਸਮੈਂਟ ਦੇ ਅਧਿਕਾਰੀਆਂ ਨੇ ਪੂਰੇ ਖੇਤਰ ਦੀ ਘੇਰਾਬੰਦੀ ਕੀਤੀ ਹੋਈ ਹੈ ਅਤੇ ਨੇੜਲੇ ਵਸਨੀਕਾਂ ਨੂੰ ਆਪਣੇ ਘਰਾਂ ਵਿੱਚ ਰਹਿਣ ਦੀ ਸਲਾਹ ਦਿੱਤੀ ਹੈ। ਸਥਾਨਕ ਟੀਵੀ ਫੁਟੇਜ ਨੇ ਇਲਾਕੇ ਵਿਚ ਭਾਰੀ ਪੁਲਿਸ ਮੌਜੂਦਗੀ ਦਿਖਾਈ ਹੈ।
ਸਨਰਾਈਜ਼, ਲਗਭਗ 94,000 ਲੋਕਾਂ ਦੀ ਅਬਾਦੀ ਵਾਲਾ ਸ਼ਹਿਰ ਹੈ। ਇਹ ਕਾਫ਼ੀ ਮਹਿੰਗਾ ਏਰੀਆ ਹੈ। ਇਹ ਸ਼ਹਿਰ ਏਵਰਗਲੇਡਜ਼ ਦੇ ਕਿਨਾਰੇ ਤੇ ਫੋਰਟ ਲੌਡਰਡੈਲ ਦੇ ਪੱਛਮ ਵੱਲ ਹੈ।