ਕੈਲੀਫੋਰਨੀਆਂ : ਸੈਨ ਹੋਜੇ ਦੀ ਚਰਚ ਵਿੱਚ ਛੁਰੇਮਾਰੀ ਨਾਲ ਹੋਈਆਂ ਦੋ ਮੌਤਾਂ

ਫਰਿਜ਼ਨੋ (ਕੈਲੀਫੋਰਨੀਆਂ), 24 ਨਵੰਬਰ (ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) – ਕੈਲੀਫੋਰਨੀਆਂ ਦੇ ਸੈਨ ਹੋਜੇ ਵਿੱਚ ਇੱਕ ਚਰਚ ਅੰਦਰ ਹੋਈ ਛੁਰੇਮਾਰੀ ਦੀ ਮੰਦਭਾਗੀ ਘਟਨਾ ਵਿੱਚ ਦੋ ਵਿਅਕਤੀਆਂ ਦੀ ਮੌਤ ਹੋ ਗਈ ਹੈ। ਐਤਵਾਰ ਰਾਤ ਨੂੰ ਚਰਚ ਵਿੱਚ ਚਾਕੂ ਮਾਰ ਕੇ ਇੱਕ ਵਿਅਕਤੀ ਦੁਆਰਾ ਦੋ ਲੋਕਾਂ ਦੀ ਜਾਨ ਲੈਣ ਦੇ ਨਾਲ ਕਈ ਹੋਰ ਗੰਭੀਰ ਜ਼ਖਮੀ ਕਰ ਦਿੱਤੇ ਗਏ। ਪੁਲਿਸ ਅਨੁਸਾਰ ਉਸ ਸਮੇਂ ਚਰਚ ਵਿੱਚ ਕੋਈ ਸੇਵਾ ਜਾਂ ਗਤੀਵਿਧੀ ਨਹੀਂ ਚੱਲ ਰਹੀ ਸੀ ਪਰ ਕਈ ਬੇਘਰੇ ਲੋਕਾਂ ਨੂੰ ਠੰਡ ਤੋਂ ਬਚਾਉਣ ਲਈ ਚਰਚ ਅੰਦਰ ਲਿਆਂਦਾ ਗਿਆ ਸੀ। ਜਦਕਿ ਇਸ ਘਟਨਾ ਪਿੱਛੇ ਹਮਲਾਵਰ ਦਾ ਮਕਸਦ ਅਜੇ ਸਾਹਮਣੇ ਨਹੀਂ ਆਇਆ ਹੈ। ਇਸ ਘਟਨਾ ਦੇ ਮਾਮਲੇ ਵਿੱਚ ਮੇਅਰ ਸੈਮ ਲਿਕਕਾਰਡੋ ਨੇ ਵੀ ਪੀੜਤਾਂ ਵਿਚੋਂ ਘੱਟੋ ਘੱਟ ਦੋ ਦੀ ਮੌਤ ਹੋਣ ਦੀ ਪੁਸ਼ਟੀ ਕੀਤੀ ਹੈ ,ਇਸਦੇ ਨਾਲ ਹੀ ਪੁਲਿਸ ਦੁਆਰਾ ਇੱਕ ਸ਼ੱਕੀ ਵਿਅਕਤੀ ਨੂੰ ਹਿਰਾਸਤ ਵਿੱਚ ਲੈਣ ਬਾਰੇ ਵੀ ਖੁਲਾਸਾ ਕੀਤਾ ਹੈ।