ਅਮਰੀਕਾ ਵਿੱਚ ਰੋਜ਼ਾਨਾਂ ਦੇ ਕੋਵਿਡ -19 ਕੇਸਾਂ ਵਿੱਚ ਹੋਇਆ ਰਿਕਾਰਡ ਵਾਧਾ

ਫਰਿਜ਼ਨੋ (ਕੈਲੇਫੋਰਨੀਆ), 6 ਨਵੰਬਰ (ਗੁਰਿੰਦਰਜੀਤ ਨੀਟਾ ਮਾਛੀਕੇ/ ਕੁਲਵੰਤ ਧਾਲੀਆਂ)- ਅਮਰੀਕਾ ਵਿੱਚ ਵਾਇਰਸ ਦੇ ਨਵੇਂ ਕੇਸਾਂ ਵਿੱਚ ਲਗਾਤਾਰ ਵਾਧਾ ਹੋਣਾ ਜਾਰੀ ਹੈ। ਦੇਸ਼  ਨੇ ਬੁੱਧਵਾਰ ਨੂੰ ਕੋਰੋਨਾਂ ਦੀ ਲਾਗ ਦੇ  102,831 ਨਵੇਂ ਕੇਸ ਦਰਜ਼ ਕੀਤੇ ਹਨ।ਇੰਨੀ ਵੱਡੀ ਗਿਣਤੀ ਵਿੱਚ ਵਾਇਰਸ ਦੇ ਕੇਸ ਮਹਾਂਮਾਰੀ ਦੀ ਸ਼ੁਰੂਆਤ ਤੋਂ ਬਾਅਦ ਪਹਿਲੀ ਵਾਰ ਸਾਹਮਣੇ ਆਏ ਹਨ। ਉੱਚ ਪੱਧਰ ਦਾ ਇਹ ਵਾਧਾ ਬਹੁਤ  ਦੁਖਦਾਈ ਹੈ ਪਰ ਮਾਹਰਾਂ ਨੇ ਪਹਿਲਾਂ ਹੀ ਭਵਿੱਖਬਾਣੀ ਕੀਤੀ ਸੀ ਕਿ ਸਰਦੀਆਂ ਵਿੱਚ ਲਾਗ ਦੀ ਹਾਲਤ ਹੋਰ ਬਦਤਰ ਹੋ ਸਕਦੀ ਹੈ। ਵਾਇਰਸ ਦੇ ਮਾਮਲੇ ਵਿੱਚ ਪਿਛਲੇ ਹਫਤੇ ਹੀ, ਯੂ ਐਸ ਨੇ ਜਿਆਦਾ ਕੇਸਾਂ ਵਾਲੇ ਅੰਕੜਿਆਂ ਦੇ ਪੰਜ ਦਿਨ  ਵੇਖੇ ਹਨ ਜਿੱਥੇ ਕਿ 30 ਅਕਤੂਬਰ ਨੂੰ ਕੇਸਾਂ ਦੇ ਵਾਧੇ ਦਾ  ਰਿਕਾਰਡ 99,321 ਲਾਗਾਂ ਨਾਲ ਦਰਜ਼ ਕੀਤਾ ਗਿਆ ਸੀ । ਜਦਕਿ ਨਵੇਂ ਇਨਫੈਕਸ਼ਨਾਂ ਦੀ ਦੇਸ਼ ਭਰ ਵਿੱਚ 7 ​​ਦਿਨਾਂ ਦੀ ਔਸਤ ਹੁਣ ਲਗਭਗ 89,859 ਹੈ ਜਿਸ ਵਿੱਚ 108 % ਦਾ ਵਾਧਾ ਸਿਰਫ ਇੱਕ ਮਹੀਨੇ ਵਿੱਚ ਹੋਇਆ ਹੈ। ਜੋਨਸ ਹੌਪਕਿਨਜ਼ ਯੂਨੀਵਰਸਿਟੀ ਦੇ ਅੰਕੜਿਆਂ ਅਨੁਸਾਰ, ਮਹਾਂਮਾਰੀ ਦੀ ਸ਼ੁਰੂਆਤ ਤੋਂ ਲੈ ਕੇ ਹੁਣ ਤੱਕ 9.4 ਮਿਲੀਅਨ ਤੋਂ ਵੱਧ ਅਮਰੀਕੀ ਕੋਵਿਡ -19 ਨਾਲ ਸੰਕਰਮਿਤ ਹੋਏ ਹਨ ਅਤੇ 233,000 ਤੋਂ ਵੱਧ ਦੀ ਮੌਤ ਵੀ ਹੋ ਗਈ ਹੈ। ਜੋਨਸ ਹੌਪਕਿਨਜ਼ ਅਨੁਸਾਰ ਸਿਰਫ ਤਿੰਨ ਅਮਰੀਕੀ ਰਾਜ ਅਲਾਬਮਾ, ਮਿਸੀਸਿਪੀ ਅਤੇ ਟੇਨੇਸੀ ਵਾਇਰਸ ਦੀ ਸਹੀ ਦਿਸ਼ਾ ਵੱਲ ਵਧ ਰਹੇ ਹਨ। ਸਿਹਤ ਅਧਿਕਾਰੀ ਵਸਨੀਕਾਂ ਨੂੰ ਸਿਹਤ ਸੰਬੰਧੀ ਸਾਵਧਾਨੀਆਂ ਨੂੰ ਵਰਤਣ ਦੀ  ਅਪੀਲ ਕਰਦੇ ਹਨ ਜੋ ਕਿ ਵਾਇਰਸ ਦੇ ਫੈਲਣ ਨੂੰ ਰੋਕਣ ਵਿੱਚ ਮਦਦਗਾਰ ਹਨ ਜਿਹਨਾਂ ਵਿੱਚ ਚਿਹਰੇ ਨੂੰ ਮਾਸਕ ਨਾਲ ਢਕਣਾ ਅਤੇ ਸਮਾਜਿਕ ਦੂਰੀ ਮਹੱਤਵਪੂਰਨ ਹਨ।ਇਸਦੇ ਨਾਲ ਹੀ ਕੋਵਿਡ ਟਰੈਕਿੰਗ ਪ੍ਰੋਜੈਕਟ ਦੇ ਅੰਕੜਿਆਂ ਅਨੁਸਾਰ, ਪੂਰੇ ਅਮਰੀਕਾ ਵਿਚ 52,000 ਤੋਂ ਵੱਧ ਲੋਕ ਕੋਵਿਡ -19 ਨਾਲ ਹਸਪਤਾਲ ਵਿਚ ਦਾਖਲ ਹਨ ਜਦਕਿ ਬੁੱਧਵਾਰ ਨੂੰ ਘੱਟੋ-ਘੱਟ 16 ਰਾਜਾਂ ਵਿੱਚ ਹਸਪਤਾਲ ਵਿੱਚ ਦਾਖਲ ਹੋਣ ਵਾਲੇ ਮਰੀਜ਼ਾਂ ਦੀ ਗਿਣਤੀ ਵਿੱਚ ਵੀ ਵਾਧਾ ਹੋਇਆ ਹੈ। ਅਮਰੀਕੀ ਸਟੇਟ ਜਿਵੇਂ ਕਿ ਓਰੇਗਨ ਵਿੱਚ, ਸਿਹਤ ਅਧਿਕਾਰੀਆਂ ਨੇ ਬੁੱਧਵਾਰ ਨੂੰ 597 ਨਵੇਂ ਕੇਸਾਂ ਦੀ ਰਿਪੋਰਟ ਕੀਤੀ ਹੈ ਜਿਸ ਨਾਲ ਇੱਕ ਹਫ਼ਤੇ ਵਿੱਚ ਛੇਵੀਂ ਵਾਰ ਇਹ ਗਿਣਤੀ 500 ਤੋਂ ਉਪਰ ਹੋ ਗਈ ਹੈ ਅਤੇ ਰਾਜ ਦਾ ਇੱਕ ਰੋਜ਼ਾ ਰਿਕਾਰਡ, 600 ਕੇਸਾਂ ਨਾਲ 30 ਅਕਤੂਬਰ ਨੂੰ ਦਰਜ਼ ਕੀਤਾ ਗਿਆ ਸੀ। ਇੰਨਾਂ ਹੀ ਨਹੀਂ ਵਿਸਕਾਨਸਿਨ ਨੇ ਵੀ ਬੁੱਧਵਾਰ ਨੂੰ ਆਪਣੇ ਰੋਜ਼ਾਨਾ ਦੀ ਕੇਸ ਗਿਣਤੀ ਦੇ ਰਿਕਾਰਡ ਤੋੜੇ ਹਨ ਜਦੋਂ ਕਿ ਇਲੀਨੋਏ ਅਤੇ ਓਹੀਓ  ਵਿੱਚ ਵੀ ਵਾਇਰਸ ਦੇ ਨਵੇਂ ਮਾਮਲੇ ਦਰਜ਼ ਕੀਤੇ ਗਏ ਹਨ।